Ektor Kuper: Biz “Shina Cup” musobaqasida Osiyo Kubogidagi kabi o‘yin ko‘rsatishga harakat qilamiz

Avval xabar berganimizdek, bugun Nanning shahridagi “Guanxi Sports Centre” stadionida “China Cup-2019” musobaqasi oldidan matbuot anjumani tashkil qilindi. Matbuot anjumanida milliy terma jamoamiz bosh murabbiyi Ektor Kuper va terma jamoamiz hujumchisi Eldor Shomurodov qatnashdi. Dastlab, Kuper o‘z fikrlarini bildirib o‘tdi. Bu haqda O‘FA matbuot xizmati xabar berdi.

Ektor Kuper: - Bu erda bo‘lib turganimdan xursandman. “Shina Cup” juda yaxshi musobaqa. Bu turnirda kuchli jamoalar ishtirok etishadi. Ularga qarshi o‘ynash biz uchun foydali bo‘lishi shubhasiz. Ushbu musobaqa orqali jahon chempionati saralashiga tayyorgarlik ko‘ramiz. Tayyorlanish uchun ko‘p vaqt bo‘lmadi. Kecha keldik. Hozircha, bir marta mashg‘ulot o‘tkazdik. Shunga qaramay, musobaqa davomida o‘zimizning eng yaxshi o‘yinimizni ko‘rsatishga intilamiz.

Osiyo Kubogi bilan solishtirganda, tarkibimizda katta o‘zgarishlar yo‘q. Deyarli o‘sha futbolchilar bilan Xitoyga tashrif buyurdik. “China Cup” musobaqasida Osiyo Kubogidagi kabi o‘yin namoyish qilishga harakat qilamiz. Har bir uchrashuvda g‘alaba qozonish uchun maydonga tushamiz. Xitoyga birinchi bor kelishim. Avval bu mamlakatda bo‘lmaganman. Shu sababli jamoam bilan yorqin o‘yin namoyish qilishni maqsad qilganmiz. Ammo biz uchun eng muhimi JChga yo‘llanmani qo‘lga kiritish.

Fabio Kannavaro ayni paytda Xitoy terma jamoasini boshqarib borayotganini bilaman. U 15 yil oldin Milanning «Inter” tarkibida o‘ynagandi. U juda yaxshi futbolchi. Tartibli o‘yin namoyish qilardi. U murabbiy sifatida ancha tajriba to‘plagani aniq. Futbolchilardan ham tartib intizomga amal qilishni talab qilishi tabiiy. Men Kannavaroga murabbiylik faoliyatida omad tilayman. U buyuk murabbiy bo‘lib etishishiga ishonaman. Unda buning uchun barcha jihatlar mavjud. Agar maydonda murabbiy sifatida uchrashadigan bo‘lsak, Kannavaroni mag‘lubiyatga uchratishga harakat qilaman.

Jahon chempionati ishtirokchilari sonini oshirish juda yaxshi g‘oya. Bu faqat O‘zbekiston yoki Xitoy uchun emas, Osiyodagi barcha terma jamoalar uchun juda yaxshi imkoniyat. Men bu g‘oyani qo‘llab-quvvatlayman. Bu holat butun dunyoda futbol rivojiga hissa qo‘shishi aniq.

Eldor Shomurodov: - Bizni Xitoyda juda yaxshi kutib olishdi. Buning uchun tashkilotchilarga katta rahmat. Nanning yangi shahar ekan. Juda chiroyli, menga yoqdi va ijobiy taassurot qoldirdi.