Fayzullaev TsSKA engilmas raqibni qanday yutganini sirini aytdi

Rossiya Premer-ligasi 13-turining markaziy uchrashuvi Moskvada TsSKA va musobaqa peshqadami “Krasnodar” o‘rtasida kechdi.

O‘yin taqdirini poytaxtlik “armiyachilar” foydasiga hal qilgan yagona gol 41-daqiqada Fyodor Chalov tomonidan kiritildi. Bu golda hujumchiga superpas oshirib, uni qulay pozitsiyaga chiqargan Abbosbek Fayzullaevning xizmati katta bo‘ldi.

Uchrashuvdan keyin o‘zbek legioneri “Match TV” jurnalistlariga intervyu berib, g‘alaba haqida fikr-mulohazalarini bildirdi.

- Bugun TsSKA safida eng yaxshi futbolchi bo‘la olmaganingiz g‘alati tuyulmayaptimi?

- Nega endi? Tarkibda o‘zini o‘yinga 100 foiz bag‘ishlagan boshqa o‘yinchilar ham bor. Masalan, Fyodor Chalov, yagona golni urib, jamoamizning g‘alabasini ta’minladi. O‘ylashimcha, eng zo‘ri u bo‘ldi.

- Siz unga golli pas uzatdingiz. Bugun TsSKA nimani evaziga “Krasnodar”ni enga oldi?

- Balki jamoviy ruhiyat ko‘tarinkiligi evazigadir, biz muxlislarimizni quvontirish uchun oxirigacha o‘ynadik. Bugun bizni qo‘llab-quvvatlashga juda ko‘p ishqibozlar keldi va biz g‘alaba qozona oldik.

- “Krasnodar” kuchli bosim o‘tkazgan so‘nggi 20 daqiqa ancha og‘ir o‘tdimi?

- O‘yinning so‘nggi daqiqalari har doim og‘ir bo‘ladi.  Chunki unda kutilmagan holatlar va xavfli vaziyatlar ko‘p bo‘ladi. Lekin jamoaga balli, hamma borini berib o‘ynadi.

- TsSKA musobaqa peshqadamini engib, bu jamoani  mavsumdagi birinchi mag‘lubiyatni qabul qilishga majbur etdi. Bu g‘alabaning siz uchun ahamiyati qanday?

- Biz har bir uchrashuvda g‘olib chiqish uchun o‘ynaymiz. Bugun biz yutuqqa erishdik, chempionat peshqadamini taslim qildik.

- TsSKAga o‘yinda g‘olib chiqishga yordam bergan taktik qarorlar qanday edi?

- Biz har bir uchrashuvga o‘ziga xos taktika bo‘yicha tayyorgarlik ko‘ramiz, raqibning kuchli va zaif tomonlarini o‘rganib chiqamiz. Bu gal ham raqib jamoa o‘yinini chuqur o‘rganib chiqdik va bu bizning g‘alaba qozonishimizda qo‘l keldi.

- Sizga sovuqlik qilmayaptimi?

- Bunaqa qaynoq o‘yindan keyin sovuq sezilmayapti.

Abbosbek Fayzullaev Rossiya Premer-ligasida sakkizta uchrashuvda qatnashib, raqiblar darvozasini bir marotaba ishg‘ol qilgan va jamoadoshlariga ikkita gol pas uzatgan. Endi hamyurtimiz TsSKA jamoasi tarkibida navbatdagi bellashuvni 5 noyabr kuni o‘z maydonida “Nijniy Novgorod” futbolchilariga qarshi o‘tkazadi.

"Barsa"da o‘ynagan futbolchi Fayzullaevga baho berdi

Shomurodovning ishlari yaxshi tomonga o‘zgardi

Raneri muhim o‘yin oldidan Shomurodovning ahvoli haqida ma’lumot berdi