Fayzullaevning Ispaniyadagi kuchli klubga ketishini kutayotgan selektsioner yana 2-3 nafar o‘zbek futbochisini nishonga oldi!
TsSKA tarkibida uch karra Rossiya chempioni bo‘lgan taniqli futbolchi Alan Dzagoev hozir “armiyachilar” klubida selektsioner bo‘lib xizmat qilmoqda. Bu mutaxassisning asosiy vazifasi klubga iqtidorli yosh o‘yinchilarni topib kelishdan iborat.
Alan Dzagoev “Sport Ekspress” nashriga bergan intervyusida o‘zbek futboli tarbiyalanuvchilari, xususan, moskvaliklar safida ikkinchi mavsumini muvaffaqiyatli boshlagan Abbosbek Fayzullaev haqida o‘z fikr-mulohazalarini ham bildirdi.
— TsSKA selektsionerlari asosan qaysi mamlakatlar futbol bozorini kuzatib keladi? Qaysi mintaqalar kuzatuvda?
— Hamma joyni kuzatamiz. Urugvaydan tortib, Braziliyagacha, Chilidan to Meksikagacha. Masalan, o‘zim oxirgi marotaba Misrga borib, u erdagi futbolchilarni kuzatdim, o‘rgandim. Marokashlik charm to‘p ustalariga e’tibor qaratdik. Juda iqtidorli eronliklar bor. Umuman olganda, har bir mintaqadan juda iste’dodli yigitlarni topish mumkin.
Hozir o‘zbeklarda juda yaxshi avlod etishib chiqmoqda. May oyida ular 23 yoshgacha bo‘lgan futbolchilar o‘rtasidagi Osiyo kubogining finalida Yaponiyaga qarshi o‘ynadi. O‘sha uchrashuvni tomosha qildim. Umuman olganda, 2-3 nafar o‘zbek futbolchilarining o‘yini yoqdi.
— Sen o‘yinchini baholashda faqat uning o‘yiniga e’tibor qaratasanmi yoki boshqa qator jihatlarni ham inobatga olasanmi?
— Ba’zan bir futbolchini kuzatasan, u haqida xulosa tayyorlaysan, lekin boshqa o‘yinchilar, hatto raqib vakili e’tiboringni tortadi. Men faqat professional sifatlariga qarayman.
Agar o‘yinchi yoqib qolsa, keyin u bilan qanday kelishish mumkinligi haqida bosh qotiramiz. Har holda, hozir Evropaning kuchli chempionatlaridan Rossiyaga futbolchi olib kelish juda katta muammo. Lekin afrikaliklar bilan hech qanday qiyinchilik bo‘lmaydi.
— Sen o‘zbeklar haqida gapirding. Kelasi yozda Abbosbek Fayzullaev Evropaning top-klublaridan biriga o‘tib ketsa, hayron bo‘lmaysanmi?
— Yo‘q, hayron bo‘lmayman.
— Qay darajadagi klubga o‘tishi mumkin?
— Har holda “Barselona” bo‘lmasa ham Ispaniya chempionatida beshinchi, oltinchi o‘rinda yuradigan jamoalarda o‘ynay oladi.
— “Real Sosedad”ga o‘xshaganmi?
— Masalan shunday. Agar Abbos hozirgi darajasida o‘ynashda davom etsa, bir-ikki yildan keyin uni TsSKAda ko‘rmaymiz.
Eslatib o‘tamiz, “Paxtakor” tarbiyalanuvchisi bo‘lgan Abbosbek Fayzullaev o‘tgan yilning avgust oyida 500 ming evro evaziga TsSKAga ko‘chib o‘tgan edi. TsSKA tarkibida Rossiya Premer-ligasi va mamlakat kubogi, O‘zbekistonning turli terma jamoalari safida nufuzli xalqaro musobaqalardagi muvaffaqiyatli o‘yini orqali nom qozongan 20 yoshli futbolchimiz Evropaning kuchli ligalarida o‘ynash salohiyatiga ega ekani aytilmoqda.
Abbosbek Fayzullaevning transfer summasi bir necha baravar ko‘tarilib, bugungi kunda olti million evroni tashkil qilmoqda. Hamyurtimiz ayni paytda Markaziy Osiyoning eng qimmat futbolchisi hisoblanadi.
Fikrlar