Hakim Fuzaylov "Buxoro" bosh murabbiyi etib tayinlandi. Klub nomi endi "Nurafshon" emas!

“Dinamo”ni Superligaga olib chiqqan tojikistonlik Hakim Fuzaylov kuni kecha iste’foga chiqarilgandi. Lekin uning ishsizligi uzoq davom etmadi. Boisi, ushbu mutaxassis endi “Buxoro” klubi bosh murabbiyi lavozimida ishlaydi. Bu xususida klub matbuot xizmati xabar berdi.

“Bugun “Buxoro” klubi anjumanlar zalida navbatdan tashqari yig‘ilish bo‘lib o‘tdi. Unda Buxoro viloyati hokimi o‘rinbosari, viloyat turzim va sport bosh boshqarmasi boshlig‘i Botirjon Shaxriyorov, Buxoro neftni qayta ishlash zavodi ma’sul xodimi hamda viloyat turzim va sport bosh boshqarmasi boshlig‘i o‘rinbosari Ismoil Mirzaev ishtirok etishdi.

Yig‘ilish davomida “Buxoro” jamoasiga bosh murabbiy etib tajribali mutaxassis Hakim Qayumovich Fuzaylov tayinlandi. Murabbiylik faoliyatini aynan “Buxoro”da boshlagan Hakim Qayumovich oldiga, yangi mavsumda Superligaga chiqish vazifasi qo‘yildi”, - deya yozmoqda, “Buxoro” matbuot xizmati.

Bundan tashqari, jamoa nomi yana “Buxoro” deya nomlanadigan bo‘ldi. Mazkur yig‘ilishda mutasaddilar aynan shunday qarorga kelishdi. Xabaringiz bo‘lsa, klub “Nurafshon”ga o‘zgartirilgandi, ammo rahbariyat yana avvalgi nomiga qaytishni afzal ko‘rdilar.