Hakim Fuzaylov "Buxoro"ning dastlabki g‘alabasi qanday qo‘lga kiritilgani xususida gapirdi

Pro liganing dastlabki ikkita turida durang o‘ynagan “Buxoro” klubi bugun 3-turda Muborakdagi Bahrom Vafoev nomli stadionda mezbon jamoa sifatida “Turon”ni qabul qildi.

Qiziqarli kechgan o‘yinda “Buxoro” 2:1 hisobida g‘alaba qozonib, ilk g‘alabasini qo‘lga kiritdi. Uchrashuvdan so‘ng, buxoroliklar bosh murabbiyi Hakim Fuzaylov bahs haqidagi fikrlari bilan o‘rtoqlashdi.

- O‘yin haqida nima deyishim mumkin, har doim aytgan gapimni yana takrorlayman: pro ligada oson o‘yin bo‘lmaydi. Ushbu chempionat o‘z nufuziga ega bo‘lyapti. Kuchsiz jamoalarning o‘zi yo‘q. Bugungi o‘yin ham buning yorqin isboti.

“Turon” jamoasi mavsum startini juda yaxshi boshladi, ketma-ket 2 ta g‘alabaga erishishdi. Futbolchilarimning g‘alabaga bo‘lgan ishtiyoqlari meni bugun xursand qildi.

O‘yinga kelsak, jamoalar bir-biriga munosib ko‘rinishdi. Futbolchilarim birinchi g‘alabani munosib ravishda qo‘lga kiritishdi. Raqibdan farqli o‘laroq, golga tortadigan vaziyatlar bizda ko‘proq sodir bo‘ldi, menimcha.

"Buxoro" matbuot xizmati.