Jahonbaxsh Masharipovga javob qaytardi: "Bizni O‘zbekiston bilan solishtirish kulgili"

Jahon chempionati saralashidan o‘rin olgan O‘zbekiston - Eron bahsi bo‘lib o‘tdi. 

Uchrashuv davomida bir nechta yaxshi imkoniyatlar bo‘lishiga qaramay, darvozalar ishg‘ol qilinmadi va tomonlar bir ochkodan bo‘lishib olishdi. Mehmonlar esa bir kishi kam bo‘lib qolishgandi. Forslar sardori Alirizo Jahonbaxsh uchrashuvdan so‘ng o‘z fikrlari bilan o‘rtoqlashdi.

"O‘ylaymanki, biz birinchi bo‘limda yaxshiroq o‘ynadik. Ikkinchi bo‘limda ham to‘pni nazorat qildik va gol urishga harakat qildik. 10 kishi bo‘lib qolganimizdan keyin esa biroz qiynaldik. 

So‘nggi daqiqalarda 11 metrli jarima zarbasining berilmasligi kulgili bo‘ldi. Ushbu vaziyatni qayta-qayta ko‘rdik, hakam natijaga ta’sir qildi. Menimcha bu holatda 100 foiz penalti bor edi.

Eshitishimcha, o‘zbekistonlik futbolchilar o‘yin oldidan futbolchilarimizning holati haqida gapirishgan. Ikki terma jamoa o‘yinchilari o‘rtasidagi farq juda va juda katta, terma jamoada ham, futbolchilarning klubini hisobga oladigan bo‘lsak ham.
Ular hali endi-endi Evropaning top ligalarida o‘ynamoqda. Bu taqqoslash men uchun kulgili. Bahsda 10 kishi bo‘lib qoldik. Shunda ham ular g‘alaba qozona olmadi. Ularning sifat haqidagi gaplari menga g‘alati tuyuldi.

Albatta biz Eronda Qatarga qarshi o‘ynashni maqul ko‘rgan bo‘lardik, afsuski bunday bo‘lmadi. Ishonchim komilki, keyingi bellashuvda bugungidan ancha yaxshi o‘yin ko‘rasiz. Osiyo kubogida mag‘lubiyat uchun alamimizni olamiz", - dedi Alirizo Jahonbax "Varzesh3" nashriga bergan intervyusida.