"Lokomotiv" safarda yirik hisobda g‘alaba qozondi

O‘zbekiston Superligasi 7-turidan o‘rin olgan "Mash’al" - "Lokomotiv" uchrashuvi o‘z yakuniga etdi. Unda mehmonlar 4:1 hisobida g‘alaba qozondi.

"Temiryo‘lchilar" Abduxoliqovning penaltidan kiritgan goli bilan hisobni ochdi. Oradan 10 daqiqa o‘tib, Qobilov hisobni ishonchli ko‘rinishga keltirdi. Raqib himoyachisining xatosidan keyin Temurxo‘ja dublni rasmiylashtirdi. 83-daqiqada Maxaradze aniq zarbasi bilan jamoasining yirik hisobdagi g‘alabasini ta’minladi. Muborakliklar etakchisi Murtazoev 86-daqiqada oradagi farqni qisqartirdi.

Shu tariqa, safarda g‘alaba qozongan "Loko" ochkolari sonini 11 taga etkazib olgan holda, onlayn turnir jadvalida 4-o‘ringa ko‘tarilib oldi. O‘z uyida imkoniyatni boy bergan "Mash’al" 11-pog‘onani band etib turibdi.

• 90+3'
  

  Учрашув якунланди. "Локо" навбатдаги ғалабасини тантана қилди.

• 90+2'

  Сўнгги сонияларда тўп майдон марказида бўлиб турибди.

• 90'
  

  Ўйиннинг асосий вақтига 3 дақиқа қўшиб берилди.

• 88'

  Голдан руҳланган мезбонлар ҳисобни қисқартириш илинжида олдинга ўтмоқда.

• 86'
  

  ГОООООООООООЛ! Муртазоев ҳисобдаги фарқни қисқартирди!

  Нуқта қаршисига келган Ҳумоюн ўзидан ўнгга зарба бериб, дарвозабонни ожиз қолдирди.

• 85'
  

  Жарима майдони ичида Комилов рақибини йиқитди. Ҳакам пенальти белгилади.

• 83'
  

  ГООООООООООЛ! Махарадзе ҳисобдаги фарқни оширди!

  Бурчакдан етказиб берилган тўпни Кахи боши билан дарвозага йўллади.

• 80'

  "Локо"нинг ҳужумлари давом этмоқда.

• 78'
  

  Ғанихонов ва Алижонов майдонга тушди. Улар Сидиқов ҳамда Рашидхоновни алмаштирди.

• 75'

  Секейра шогирдлари майдон бўйлаб тўпни ўзларида ушлаб турибди.

• 72'
  

  Азиз Амоновнинг ўткир бурчакдан йўллаган зарбасини Эшбўтаев қайтарди.

• 71'

  Ўйин темпини яна "темирйўлчилар" белгиламоқда.

• 69'
  

  Махарадзенинг узатмасидан кейин Абдухолиқов офсайдда қолиб кетди.

• 67'
  

  Меҳмонлар сафида ўзгариш: Туропов ҳамда Қобилов ўрнига Махарадзе ва Жумабоев ўйинга қўшилди.

• 64'
  

  ГОООООООООЛ! "Локо" ҳисобни йирик кўринишга келтирди!

  Ҳимоячининг хатосидан кейин Абдухолиқов қулай имкониятни голга айлантирди.

• 63'

  Сидиқов берган пас ҳимоячилардан ўтмади. Тўп йўқотилди.

• 61'

  "Машъал" футболчиларининг жарима майдонига ошираётган кетма-кет узатмалари бартараф этилмоқда.

• 59'

  Иккинчи 45 дақиқаликда Хомяков шогирдлари ҳам нисбатан фаолроқ ўйин кўрсатмоқда.

• 57'
  

  "Локомотив" футболчисига шифокорлар ёрдам кўрсатмоқда.

• 55'

  Сидиқовнинг узатмасидан кейин жамоадоши тўпга зарба бера олмади.

• 53'

  Иккинчи қаватдаги тўп учун курашда Амонов рақибига нисбатан қоида бузди.

• 51'

  Шаймановнинг зарбасидан кейин тўп устун ёнгинасидан ўтиб кетди.

• 50'

  Жарима майдони яқинда муборакликлар стандарт вазиятни қўлга киритди.

• 48'

  Илёсовнинг хатосидан рақиб футболчиси фойдалана олмади.

• 46'
  

  Иккинчи тайм бошланди!

• 45+2'
  

  Танаффус!

• 45+1'

  Сўнгги дақиқалар сокин тарзда ўтмоқда.

• 45'
  

  Биринчи бўлимга 2 дақиқа қўшиб берилди.

• 44'

  Муборакликлар бўлим сўнгида стандарт вазиятни қўлга киритди.

• 42'

  "Машъал" футболчиси жарима майдони ичида зарба беришга кечикди. Ҳимоячилар уни зарарсизлантирди.

• 40'
  

  Комиловга нисбатан қоида бузган Муртазоев огоҳлантирилди.

• 39'

  Йўлдошевнинг яқин масофадан берган зарбаси ноаниқ кетди. Муҳаммад бўш қолган дарвозани ишғол эта олмади.

• 37'
  

  Ғулом-Ҳайдар Ғуломов ўйинни давом эттира олмайди. Унинг ўрнига Азизбек Амонов ўйинга қўшилди.

• 37'

  Бош ҳакам футболчиларга салқинланиб олиш имкониятини берди. "Cooling break!"

• 35'
  

  СЕЙВ! Нуқта қаршисига келган Сидиқов ўзидан чап томонга зарба берди. Эшбўтаев хавфни бартараф этди.

• 34'
  

  Ғуломовга тиббий ёрдам кўрсатилмоқда.

• 33'
  

  Жарима майдони ичида Шукуруллаев рақибини қўполлик эвазига тўхтатди. Бу - пенальти!

• 32'

  Ўйин теммпини меҳмонлар белгилаб бермоқда.

• 30'

  Жарима майдони остонасида тўпни қабул қилган Сидиқов уни шерикларига етказа олмади.

• 28'

  "Темирйўлчилар" ўз ярим майдонида тўпни ушлаб турибди.

• 26'
  

  Эшбўтаевдан дабл-сейв! Мезбонлар посбони Сидиқов ва Рашидхонов томонидан йўлланган икки зарбаси қайтаришга муваффақ бўлди.

• 25'

  Ўйин Секейра шогирдларининг катта устунлиги остида давом этмоқда.

• 23'
  

  Диёр Туропов ўйиндан ташқари ҳолатда қолиб кетди.

• 21'
  

  ГООООООООЛ! "Локо" ҳисобни ишончли кўринишга келтирди!

  Бурчакдан етказиб берилган тўпни Қобилов дарвозага киритди.

• 20'
  

  "Темирйўлчилар" тўпни бурчакдан ўйинга киритиш имкониятини қўлга киритди.

• 19'

  Ҳисоб тенглашишига бир баҳя қолди. Аммо "Машъал" футболчисининг бош билан йўллаган зарбасига аниқлик етишмади.

• 18'
  

  Рақибига нисбатан қўполлик ишлатган Ислом Рашидхонов сариқ карточкага лойиқ кўрилди.

• 17'

  Убайдуллоев воқеалар ривожидан бироз илгарилаб кетди. Ҳакам ўйинни тўхтатди.

• 15'

  Бу сафар Шукуруллаев тактик фол ишлатди. Муборакликларда мазкур ҳолат тез-тез кўзга ташланяпти.

• 13'

  Ифеани қарши ҳужумга ўтаётган Туроповни қоида бузиш эвазига тўхтатди. Ҳакам уни оғзаки огоҳлантирди.

• 11'
  

  ГООООООООООЛ! Учрашувда ҳисоб очилди!

  Темурхўжа Абдухолиқовнинг зарбасидан кейин тўп устунга тегиб дарвозадан жой олди.

• 11'
  

  Жарима майдони ичида тўп "Машъал" футболчисининг қўлига тегиб кетди. Ҳакам нуқтани кўрсатди.

• 9'

  Сидиқовнинг қанотдан етказиб берган тўпини Эшбўтаев ушлаб олди.

• 7'

  Томонлар эҳтиёткорликка урғу қаратмоқда. Ҳозирча, дарҳол олдинга ўтиш ҳолати кузатилмаяпти.

• 5'

  Тўп назорати пойтахтликларда бўлиб тўрибди.

• 3'

  Учрашувни кутилганидек, меҳмонлар фаоллик билан бошлади.

• 1'
  

  Ўйин бошланди!