"Metallurg" yana bir legioner bilan bog‘liq muammoni hal qildi

Bu yildan e’tiboran pro ligada ishtirok etishi oydinlashgan "Metallurg" klubi tarkibini kuchaytirish bilan bir qatorda avvalgi qarzdorlik masalalarni ham hal qilishiga to‘g‘ri kelmoqda.

Jumladan, yaqinda klubning serbiyalik sobiq legioneri Ivan Yosovich oldidagi qarzdorlik ijobiy hal qilingan edi. Lekin bu hali hammasi emasdi. Jamoaning yana bir sobiq legioneri Marko Milichkovich bilan ham muammosi bor edi.

Klub matbuot xizmatining ma’lum qilishicha, Bekobodning "Metallurg" klubi sobiq futbolchisi Marko Milichkovich bilan bog‘liq vaziyatni ijobiy hal qildi. 

Chernogoriyalik futbolchi moliyaviy muammolar sababli OFKga arz qilgan edi. Qayta tashkil qilingan "Metallurg" PFK rahbariyati mazkur masalani sinchkovlik bilan o‘rganib chiqishdi hamda hal qilishni uddalashdi.

Natijada, endi "Metallurg" klubining litsenziyalash bilan bog‘liq hech qanday cheklov yoki muammolari mavjud emas. Bu borada 5 mart sanasida O‘zbekiston Professional futbol ligasiga OFKdan xat yuborilgan.

O‘z navbatida futbolchining agenti Nikola Tadich o‘yinchi va "Metallurg" klubi o‘rtasidagi barcha muammolar bartaraf etilgani to‘g‘risida xat yubordi.

Shuningdek, agent mazkur vaziyat hal etilishida jonbozlik ko‘rsatgan "Metallurg" PFK bosh direktori Ulug‘bek Mirzaevdan minnatdor ekanligini ta’kidlab o‘tdi. Nikola tajribali mutaxassis to‘liqligicha aloqani saqlab turgani, professional tarzda masalalarni hal etishda amaliy yordam ko‘rsatganiga urg‘u berib o‘tdi.