Mourinьo xet-trikdan so‘ng Mbappe haqida qattiq gapirdi

Madridning «Real» jamoasi bosh murabbiyi Joze Mourinyo Ispaniya chempionati birinchi turidan qoldirilgan, «Real Sosyedad»ga qarshi o‘yinda qo‘lga kiritilgan g‘alaba haqida fikr bildirdi, deb xabar bermoqda AS nashri. 

- «Real Sosyedad» juda kuchli jamoa. Ular bizga ancha muammo tug‘dirishdi. Raqib darvozamizga tez-tez hujum qilmagan bo‘lsa-da, bizga bosim o‘tkazish oson bo‘lmadi. Ikkinchi bo‘limda taktik o‘zgarishlar qilguncha o‘zimizni butunlay hotirjam his qila olmadik. Shunga qaramay, jamoa vaziyatni sovuqqonlik bilan qabul qildi va tanaffusdan keyin juda kuchli o‘yin namoyish etdi, — deya ta’kidladi Mourinyo.

Portugaliyalik mutaxassis alohida tarzda xet-trik muallifi Kilian Mbappe haqida ham to‘xtalib o‘tdi.

- Men odatda alohida futbolchilarni alohida maqtashni yoqtirmayman, lekin Mbappe qilgan ish — aql bovar qilmas darajada. Juda katta mahorat. U faqat gol urmaydi, balki hamkasblari uchun ham imkoniyat yaratadi. Jamoa qiynalayotgan paytda Kilian orqaga qaytib, sheriklari bilan ko‘proq o‘ynaydi, to‘pni oldinga olib chiqishga yordam beradi. U haqiqatan ham ajoyib o‘yin o‘tkazdi, — dedi murabbiy.

«Real» uchrashuvni 4:1 hisobida o‘z foydasiga hal qildi. Mbappe 40-, 60- va 80-daqiqalarda gol urdi, yana bir to‘pni mezbonlar tarkibida Vinisius Juniyor kiritdi. Mehmonlar safida yagona gol muallifi Luka Suchich bo‘ldi.

Ikki turdan so‘ng madridliklar olti ochko to‘plashdi. 30 avgust kuni Mourinyo shogirdlari o‘z maydonida «Malaga»ni qabul qiladi.