“Navbahor” Toshkentda “Paxtakor”ga qarshi o‘yinlardagi noxush an’anaga barham bera oladimi?

"Paxtakor" jamoasi Superligada 2020 yilgi mavsumni Toshkentda "Navbahor"ga qarshi o‘yin bilan boshlaydi.

Faqatgina ushbu jamoalar chempionatlar doirasida barcha mavsumlarda ishtirok etib kelishadi. Demak, bu to‘qnashuvlarni klassik qarama-qarshilik turkumiga kiritish mumkin. Tomonlar hozirga qadar 58 uchrashuvda maydonga tushishgan. O‘zaro o‘yinlar bo‘yicha ustunlik yaqqol "sherlar" tarafida. 36 bahsda zafar quchgan "Paxtakor" 9 bor raqib bilan durang o‘ynagan va 13 marta imkoniyatni boy bergan. "Navbahor" darvozasiga 98 gol urilib, 44 to‘p o‘tkazib yuborilgan.

Toshkentdagi uchrashuvlarning 24tasida mezbonlar g‘alaba qozonib, 4 durang va 1 mag‘lubiyatni qayd etgan. “Paxtakor” o‘z maydonida oxirgi 23 o‘yinda 21 g‘alaba va 2 durangga erishib, umuman mag‘lubiyatga uchramagan.

O‘zaro o‘yinlar tarixida qayd etilgan eng yirik natija - 7:0 hisobi jamoalarning Toshkentda 2009 yil o‘tgan bellashuvida kuzatilgan. O‘shanda "Paxtakor" namanganliklarni o‘ta yirik hisobda dog‘da qoldirgan. Jami 8 marta toshkentliklar namanganliklarni yirik natijalar bilan tor-mor keltirgan.

"Paxtakor" va "Navbahor" o‘rtasidagi uchrashuv bugun "Paxtakor" stadionida soat 16:00da start oladi.