"Persepolis" bosh murabbiyi: Oston O‘runov asosiy tarkibga kirish uchun avvalgi formasini tiklashi kerak!

Yaqinda Eronning "Persepolis" jamoasi bosh murabbiyi o‘zgardi. Qoniqarsiz natijalar sabab Vohid Hoshimyan iste’foga chiqarilib, uning o‘rnini braziliyalik Osmar Viera egalladi. 

Viera legionerimiz Oston O‘runov haqida fikrlarini bildirdi. U O‘runovning faoliyatida pasayish bo‘layotganini ta’kidladi.

"O‘runovning faoliyati ikki yil avvalgiga nisbatan ancha pasayib ketdi va men hozir O‘runovni ko‘rmayapman! U "Persepolis"ning asosiy tarkib futbolchisiga aylanishi uchun avvalgi Oston versiyasiga qaytishi kerak", - dedi 50 yoshli mutaxassis.

Eslatib o‘tamiz, O‘runov jarohatlar sabab o‘tgan mavsumning katta qismini o‘tkazib yuborgan edi. U joriy mavsum Eron Pro-ligasida 8 ta o‘yin o‘tkazib, bitta golli uzatmani amalga oshirdi.