"Roland Garros". Ayol tennischilar o‘z darajasida start oldi

"Roland Garros" turnirining ayollar o‘rtasidagi bellashuvlarida ham kuchlilar nomi tobora aniqlashib bormoqda. Asosiy bahslarning ilk kunida asosan kutilgan natijalar qayd etildi.

Chexiyalik Petra Kvitova frantsuz tennischisi Osean Dodanni 6:3, 7:5 hisobida mag‘lub etgan bo‘lsa, niderlandiyalik Kiki Bertens Ukrainadan tashrif buyurgan Katarina Zavatskaya ustidan 2:6, 6:2, 6:0 hisobida zafar quchdi.

Shuningdek, amerikaliklar qarama-qarshiligida Kristi An bilan bahs olib borgan Serena Uilyams 7:6, 6:0 natija bilan keyingi bosqich chiptalarini o‘ziniki qildi. Serena kabi birinchi setni qiyinchilik bilan o‘z nomiga yozdirib qo‘ygan Elina Svitolina rossiyalik raqibasi Varvara Grachyovani ikki set yakuniga ko‘ra, 7:6, 6:4 hisobida mag‘lubiyatga uchratdi.

G‘oliblik uchun asosiy da’vogarlardan yuqoridagi tennischilar turnirda o‘z yurishlarini muvaffaqiyatli boshlab oldi.