Ro‘ziqul Berdiev: "Al-Faysali"ning kuchsiz tomonlari ham bor va bu bizga ma’lum!

Osiyo Chempionlar ligasi guruh bosqich 3-turidan o‘rin olgan “Nasaf” – “Al-Faysali” uchrashuvidan oldingi matbuot anjumanida “ajdarlar” ustozi Ro‘ziqul Berdiev ishtirok etdi va o‘z fikrlarini bildirib o‘tdi.

-“Al-Faysali” jamoasi o‘yinni juda ham yaxshi tashkil qiladigan jamoa. Ularning tarkibida juda mahoratli futbolchilar bor. Biz ushbu jamoaning 2 ta o‘yinini tahlil qilib chiqdik va raqib haqida tasavvurga egamiz. O‘ylaymanki, ertangi o‘yinga jamoamiz har tomondan tayyor bo‘ladi.

"Al-Faysali" o‘tkazgan ikki o‘yinni ham unchalik omadga bog‘lamagan bo‘lardim. Raqibimiz "Al-Sadd"ga qarshi o‘yinda juda tartibli o‘yin namoyish etdi va jamoa sifatida ham juda yaxshi harakat qildi. Tarkibdagi mahoratli futbolchilarning saviyasi "Al-Sadd" ustidan qozonilgan g‘alabada yaqqol namoyon bo‘ldi.

"Al-Faysali"ning o‘yinlarini kuzatish orqali ushbu jamoa haqida tasavvurga ega bo‘ldik. Ularning kuchli tomonlari bo‘lgani kabi kuchsiz tomonlari ham bor va bu bizga ma’lum. Biz aynan shulardan foydalangan holda harakat qilamiz.