Ro‘ziqul Berdiev: Meni yolg‘onchi qilishdan kimga foyda?
Kecha O‘zbekiston Superligasi 17-turi doirasida “Nasaf” – “Lokomotiv” uchrashuvi bo‘lib o‘tdi.
Qarshidagi bellashuvning so‘nggi daqiqalarida “temiryo‘lchilar” futbolchisi Kaxi Maxaradze o‘z jarima maydonchasi ichida to‘pni qo‘li bilan o‘ynadi. Biroq bosh hakam Ahrol Risqullaev bu epizodda qo‘lning holatini tabiiy deb topdi va 11 metrlik jarima zarbasi belgilamadi.
Ushbu holatdan norozi bo‘lgan “Nasaf” ustozi o‘yindan keyingi matbuot anjumanida keskin fikrlar bildirdi. Xususan, Berdiev mazkur vaziyat VAR tomonidan ko‘rib chiqilishi kerakligi, ammo referi bu paytda videotakrorlar ishlamayotgani haqida gapirgan. Qolaversa, qarshiliklar murabbiyi “ajdarlar” muxlislarini ham keskin tanqid qilgan edi.
Shu bois, SPORTS.uz sayti Ro‘ziqul Berdiev bilan bog‘lanib, vaziyatga biroz oydinlik kiritishga harakat qildi:
- Yolg‘on gapirishning nima keragi bor?! Buni bitta men emas, barcha ko‘rdi. Ahrol Risqullaev menga VAR ishlayotganini aytdi, ammo o‘zim borib ko‘rganimda, buning aksi edi. Bilmadim, meni yolg‘onchi qilishning kimga qanday foydasi bor ekan.
- To‘g‘risini aytsam, bizning bir yillik byudjetimiz bor-yo‘g‘i 25 millard so‘mni tashkil qiladi. Bu “Olimpik” jamoasiniki bilan bir xil ko‘rsatkich. Futbolchilarimiz 1000-1500 dollar oylikka o‘ynab yuribdi. Vaholanki, ularning har biriga kamida 20 ming dollar maosh beradigan klublardan takliflar bor.
- Hozirda Superligada ishtirok etayotgan jamoalar byudjetiga e’tibor qaratadigan bo‘lsak, deyarli hammasiniki biznikidan katta. Biz faqat “olimpiyachilar” yoki oxirgi o‘rinlarda ketayotgan jamoalar bilan tenglasha olishimiz mumkin. Shu bois, bizga tinmasdan bosim o‘tkazish noto‘g‘ri.
- Kechagi uchrashuvda muxlislardan ham ozgina xafa bo‘ldim. Shunday og‘ir vaziyatda birlashmasa, qachon birlashadi?! Ular faqatgina g‘alaba qozongan paytimizda emas, balki shu kabi qiyin holatlarda ham birdek qo‘llab-quvvatlashi kerak.
- Shu bois, matbuot anjumanida biroz qizishib ketdim. Agar rahbariyat ishimiz va ko‘rsatayotgan natijalarimizdan norozi bo‘lsa, bemalol murabbiylik lavozimidan ketishim mumkin. O‘ylaymanki, har qanday mutaxassis ham O‘zbekiston Kubogida bir kishi kam bo‘lib “Paxtakor”ni mag‘lub eta olmaydi. Shuncha ko‘rsatilayotgan natijalarning barchasi o‘zimizning akademiyadan chiqqan futbolchilar evaziga qo‘lga kiritilayotgani ham bizning foydamizga ishlaydi. Ayni paytda men tarkibdagi o‘yinchilar uchun shu erdaman. Bo‘lmasa, allaqachon murabbiylik lavozimini topshirib yuborgan bo‘lardim.
- Legionerlar borasida to‘xtaladigan bo‘lsak, o‘zim istagan futbolchini jamoaga olib kelish uchun rahbariyat ham javob berishi kerak. E’tibor bergan bo‘lsangiz, 3 yildan beri bitta ekipirovkada harakat qilamiz. 3 yildan beri libosni yangilay olmayotgan jamoadan bundan ortiq yana nima kutish mumkin?! Bu — futbol. Bunda hamma narsa bo‘lishi mumkin. Kechagi o‘yinda “Lokomotiv” yaxshi himoyalandi. Agar biz bunday mudofaani yorib o‘tishni istasak, kuchli legionerlar olishimiz lozim. Ammo buni “Nasaf”ning byudjeti ko‘tarmaydi.
- Kerakli vaziyatda Osiyo Chempionlar ligasida yaxshi natija qayd etmoqdamiz, O‘zbekiston Kubogidagi natijalarimiz ham yaxshi, shuningdek, Superligada ham chempionlik uchun imkoniyatlarimiz bor. Shunda ham muxlislar bizdan norozi bo‘lmoqda.
- Hozirda ham chempionlik uchun kurashyapmiz. Biz hech narsa yo‘qotganimiz yo‘q. Ko‘pincha meni jamoani chempion qila olmasligim bilan tanqid qilishadi. Biroq "Nasaf"ga oltin medallarni olib berishim uchun boshqa talab qilinadigan narsalar ham bor. Chempionlik faqatgina murabbiy sabab qo‘lga kiritilmaydi. Kechagina ikkinchi jamoada o‘ynayotgan Husain Norchaev bilan Superligada g‘olib bo‘lish qiyin. To‘g‘ri biz o‘zimizning akademiyadan chiqqan yigitlar bilan natija ko‘rsatishga harakat qilmoqdamiz, lekin buning o‘zi kamlik qiladi. Ba’zan moddiy tomonlama kuchli bo‘lish ham chempionlik yo‘lida katta rol o‘ynaydi.
Muallif: NORBOY muallim
Endi SPORTS.uz saytiga NORBOY muallim tesha tegmagan va eng qaynoq mavzulardagi matnlarini etkazib turadi.
Fikrlar