Sergeev tanlagan “Aktobe”da futbolimiz yulduzlari porlagan!

O‘zbekistonning bugungi kundagi eng kuchli hujumchilaridan biri Igor Sergeev faoliyatini UEFA a’zosi – Qozog‘istonda davom ettirishga qaror qildi. “Paxtakor” bilan chempionlikni nishonlagan futbolchi shartnomasi yakunlangani bois “Aktobe” safiga erkin agent sifatida qo‘shildi.

“Aktobe” o‘zbek futboli maktabi tarbiyalanuvchilari uchun omadli jamoa sanaladi. Bu klubda mustaqillik yillaridagi eng yorqin o‘yinlarini namoyish etgan mashhur futbolchilarimiz to‘p tepgan.

Sports.uz portali “Aktobe”da o‘ynagan o‘zbekistonlik futbolchilar haqida ma’lumot berishni lozim topdi.

Ja’far Irismetov (hujumchi)

Mohir to‘purar 2004 yilda “Qayrat” safida Qozog‘iston chempioni bo‘lgandi. 2008 yilgi mavsum oldidan “Aktobe” ga qo‘shildi. Ja’far bu jamoada 15 ta uchrashuvda ikkita gol urdi. Shuningdek, Irismetov qo‘shni mamlakatda “Olma-ota” sharafini ham himoya qilgan.  

Aleksey Nikolaev (himoyachi)

2002-2008 yillar davomida O‘zbekiston milliy terma jamoasida o‘ynagan Aleksey Nikolaev “Aktobe”ga 2006 yilgi mavsumda borgan edi. Ungacha, iste’dodli himoyachi “Qizilqum”, “Paxtakor” va Rossiyada “Shinnik”da o‘ynagan. Nikolaev Qozog‘iston chempionatida ikki mavsumdan kamroq vaqt mobaynida jami 31 ta bellashuvda qatnashib, uchta gol urdi va 2007 yili chempionlikni qo‘lga kiritdi. Keyin yurtimizga qaytib, o‘sha paytda “Quruvchi”, deb nomlangan hozirgi “Bunyodkor”ga o‘tdi.

Timur Kapadze (yarim himoyachi)

Timur Kapadze 2012 yilgi mavsum o‘rtalarida “Sharja”dan “Aktobe”ga kelgan edi. Ikki yarim mavsum davomida tajribali  yarim himoyachimiz mamlakat chempionati oltin medali va Superkubogiga ega chiqdi. Barcha turnirlarda “qizil-oqlar” tarkibida 95 ta o‘yinda maydonga tushib, 17 ta gol urdi. 2015 yili Toshkentga qaytib, “Lokomotiv”ni tanladi.

Marat Bikmaev (yarim himoyachi)

Rossiyada “Alaniya” sharafini himoya qilgan Marat Bikmaev Qozog‘istonga kelib, “Aktobe”ga qo‘shildi. Ikki yil davomida barcha turnirlarda 34 ta o‘yin o‘tkazib, to‘rtta gol urgan hujumkor futbolchimiz  keyinchalik Toshkentning “Lokomotiv” jamoasiga ko‘chib o‘tdi. Bikmaev 2013 yilgi Qozog‘iston chempionati g‘olibi hisoblanadi.

Aleksandr Geynrix (hujumchi)

O‘zbekiston milliy terma jamoasi porlagan Geynrix ham “Aktobe”ga Birlashgan Arab Amirliklari chempionatidan o‘tgan. 2012 yilda “Emireyts” klubida ettita o‘yinda ikkita gol urgan hujumchimiz o‘zi tegishli bo‘lgan “Paxtakor”ga qaytmasdan, faoliyatini “Aktobe”da davom ettirishga qaror qildi. 2014 yilgi mavsumning yarmigacha ushbu jamoada to‘p tepgan hujumchimiz Qozog‘iston chempioni va Superkubok sohibi bo‘ldi. “Aktobe”da 78 ta o‘yinda 24 ta gol urdi. Keyinchalik Geynrix “Aktobe”da jamoa boshlig‘i va selektsioner-murabbiy lavozimida ham faoliyat yuritdi.

Bobir Davlatov (yarim himoyachi)

O‘smirlar va yoshlar terma jamoalarida etakchilik qobiliyati bilan ajralib turgan Bobir Davlatov juda erta legionerga aylangan. 2012 yilni “Mash’al”da yakunlab, keyin “Rubin”ga ketgan futbolchini qozonliklar ikki marta Qozog‘iston chempionatiga ijaraga jo‘natadi. Avval “Jetisu”, keyin “Aktobe”da o‘ynagan yosh yarim himoyachi 2017 yilda “Nefteximik” bilan shartnoma imzolab, yana Rossiyaga qaytgan. Keyinroq yurtimizda “Lokomotiv” va “Nasaf” sharafini himoya qilgan Bobir 2020 yilning kuzidan “Nefteximik”da o‘ynayapti.

Igor Sergeev (hujumchi)

Igor Sergeev Qozog‘iston chempionatiga ayni kuchga to‘lgan paytida yo‘l oldi. O‘tgan yili Sergeev “Paxtakor”ning O‘zbekiston chempionatlari tarixidagi eng zo‘r to‘purari bo‘ldi. Moir hujumchi o‘zini tarbiyalagan klub uchun chempionatda 180 ta uchrashuv o‘tkazib, gollari sonini 101 ta etkazdi. Shuningdek, Igor Sergeev  O‘zbekiston milliy terma jamoasida 53 ta uchrashuvda raqiblar darvozasini 17 marta aniq nishonga olgan.

Igor faoliyati davomida Xitoy chempionatida “Beytszin Goan” (14 ta o‘yin, bitta gol) va Birlashgan Arab Amirliklarida “Az-Zafra” (6 ta o‘yin, bitta gol) sharafini himoya qilgan.