Xushnud Xudoyberdiev "So‘g‘diyona" - "Turon" o‘yini haqida: Bosh hakamning yoki ko‘zi, yoki vijdoni ko‘r

Xabaringiz bor, bugun Jizzaxda Superliganing 2-turidan o‘rin olgan “So‘g‘diyona” hamda “Turon” (1:0) jamoalari bahsi bo‘lib o‘tdi.

Huquqshunos Xushnud Xudoyberdiev ham juda ko‘p bahs-munozaralarga sabab bo‘layotgan ushbu o‘yin borasida o‘z fikrlarini bildirib o‘tdi.

“Bugun O‘zbekiston Super ligasining 2-turida davlat byudjeti pullariga moliyalashtiriladigan Jizzaxning «So‘g‘diyona» hamda milliy chempionatimizdagi yagona xususiy jamoa Yaypanning «Turon» jamoalari o‘rtasidagi bahsda mezbonlar 1:0 hisobida g‘alaba qozonishdi.

Har yili davlat byudjetidan taxminan 20 mlrd so‘m oladigan «So‘g‘diyona» yagona golni mana shunaqa sharmandali penaltidan urdi. Bosh hakamning yoki ko‘zi, yoki vijdoni ko‘r.

Mayli, bunaqa xatoliklar VAR paydo bo‘lgungacha xalqaro futbolda ham doim bo‘lgan.

Ammo boshqa narsani aytmoqchiman:

Har yili BIR NEChA YuZ MILLIARD SO‘M byudjet pullari shu rasvo futbolimizga ketyapti, bundan biror foyda bo‘lyaptimi? Undan ko‘ra bu pullarni ta’limga, maktablarga sarflasa millat uchun ming marta foyda bo‘lardi.

Men to‘lagan soliqlardan 1 so‘mni ham futbolga berilishiga aslo rozimasman!!! Qo‘lidan kelsa jamoalar o‘zi pul ishlab topsin va ana shunda bilganini qilsin”, - dedi Xushnud Xudoyberdiev.