Мен “Реал”га қайтаман!

Франциянинг ПСЖ клуби ҳимоячиси Ашраф Ҳакими ўзи тарбияланган клуб Мадриднинг “Реал” жамоасига қайтишни мақсад қилган.

Бу ҳақда журналист Рамон Альварес де Мон X ижтимоий тармоғида хабар берди.

Манбага кўра, 27 ёшли ўнг қанот ҳимоячиси ўз яқинларига Мадрид клуби билан шартнома имзолаш учун қўлидан келган барча ишни қилишга тайёрлигини айтган.

Ҳакими болалигидан “Реал Мадрид” мухлиси бўлиб, амалдаги узоқ муддатли шартномасига қарамай, ўзининг қадрдон клубига қайтишни истайди.

У 2015–2018 йилларда Мадрид клуби тизимида бўлган.

Ҳимоячининг ўтишни исташига яна бир сабаб бор. Унинг яқин дўсти Килиан Мбаппе, у бир неча бор ҳимоячи билан яна бирга ўйнашни хоҳлашини билдирган.

Шу билан бирга, ПСЖ Ҳакимини сотишни режалаштирмаяпти, аммо агар ўйинчи кетишни талаб қилса, клуб унинг трансферини кўриб чиқиши мумкин.

Ҳакими 2021 йилда Миланнинг “Интер” клубидан 68 миллион еврога ўтиб, ПСЖ билан шартнома имзолаган.

Жорий мавсумда у парижликлар сафида 24 та ўйин ўтказиб, 3 та гол ва 7 та голли узатма амалга оширган. Унинг шартномаси 2029 йилнинг ёзигача амал қилади, Transfermarkt баҳосига кўра бозор қиймати 80 миллион евро.