Суперлигада 2-ўринми ёки ОФК кубоги ғолиблиги, журналистлар қўшиб ёзворгани ва бошқалар борасида - Рўзиқул Бердиев

 22 сентябрь куни ОФК Кубоги-2021 ҳудудлараро ярим финалида Қаршининг “Насаф” клуби Ҳиндистоннинг “Мохун Баган” жамоасини қабул қилади. Бугун учрашувдан олдин жамоалар бош мураббийлари иштирокида матбуот анжумани ўтказилди. Анжуманнинг иккинчи қисмида мезбонлар устози Рўзиқул Бердиев иштирок этди.

- ОФК кубогида рақиблар жиддийлашиб бормоқда. Ҳиндистон клубини ўрганганимизда рақиб кучли эканлигини билдик. Улар мамлакатининг энг етакчи жамоаларидан бири.

Ўз навбатида, биз ҳам яхши тайёргарлик кўрдик. Ўйиннинг аҳамиятини ҳамма тушуниб турибди. Футболчилар жисмонан тайёр. Ғалаба учун ҳаракат қиламиз.

Эртанги ғалаба рейтингга таъсир қилади. Маълум очколарни қўлга киритишимиз мумкин. Шунинг учун ўйинда мухлисларни хурсанд қилишга бор кучимиз билан курашамиз.

Ҳиндистон жамоасида алоҳида ажратиб кўрсатадиган футболчилар бор. Бироқ ҳозир маълум футболчиларга эмас, балки жамоа яхши шаклланган эканлигини айтиш муҳим. Улар британча футбол ўйнайди. Мураббий тактикани ўзгартириб боради. Легионерлар борасида ҳам яхши танловларга эга. Икки жамоа натижага эришишга интилади. 

Танлаш керак бўлса, имкониятдан келиб чиқиб Суперлигада иккинчи ўринни олишни танлармидингиз ёки ОФК кубогидаги чемпионликни? Кўпроқ ОФК кубогига эътибор қаратганмиз... Лекин икки фронтда ҳам кураш олиб боришга ҳаракат қиламиз.

Жамоадаги муаммолар? Бу ОАВда ёзилганичалик катта эмас. Журналистлар қўшиб ёзишди. Чунки биз раҳбарият билан катта жанжалга бормаганмиз. Фақат шу бироз эътибор қаратишларини сўрадик холос.

Ҳусниддин Алиқулов футболчи:

- Рақибни яхши ўргандик. Эртага чиройли ўйин намойиш этиб, мухлисларни хурсанд қилишга интиламиз.