"Сизга савол берсам майлими? "Локомотив"даги ишимни қандай баҳолайсиз? - Коростиченко истеъфо билан боғлиқ саволларга жавоб қайтарди

Аксарият клубларимиз ёзги таътилга чиқиб кетдилар. Шу фурсатдан фойдаланган ҳолда жамоаларимизда ўзгаришлар юз бермоқда. Тошкентнинг “Локомотив” клуби ҳам бундан мустасно эмасга ўхшайди.

Биринчи даврадан кейин таркибда айрим ўзгаришлар бўлиши ҳақида эшитгандик. Шу билан бирга раҳбарият томонидан мураббий ўзгартирилиши юзасидан ҳам хабарлар йўқ эмас. Биринчи даврада “Локомотив”нинг иштироки кўнгилдагидек бўлмаганлиги ва бу раҳбариятни қониқтирмаганлиги клубда ўзгаришлар юз беришига асосий сабаблардан бири сифатида қаралмоқда.

Денис Коростиченко мавсум бошида клубга бош мураббий этиб тайинланганди. Энди эса унинг кейинги тақдири мавҳум бўлиб қолмоқда. Sports.uz мухбири дарҳол вазиятга ойдинлик киритиш мақсадида мураббий билан боғланди.

- Денис Владимирович, нима бўлди? Клубдан кетганингиз ҳақиқатми?

- Бу гапни ҳозир матбуотда ўқидим. Лекин истеъфога чиққаним ҳақида эшитмадим.

- Клуб раҳбарияти билан бу масалада гаплашдингизми?

- Ҳозирча бу масалада гаплашганимиз йўқ. Эртага катта мажлис бўлади. Шунда ҳаммасини гаплашиб оламиз.

- Умуман олганда, жамоанинг биринчи даврадаги иштирокини қандай баҳолайсиз?

- Биз жуда оз очко йиғдик. Боз устига айрим учрашувларда ташаббусга эга бўлсак-да, якунда қуруқ қўл билан қолиб кетдик. Аммо шуни айтмоғим керакки, биринчи даврада ҳамма рақибга муносиб қаршилик кўрсатган ҳолда ўйинлар намойиш этдик. Айрим ҳолларда бизда ҳужумларни маромига етказиб якунлайдиган ўткир, тажрибали ижрочи етишмади. Ўйлайманки, яхши ҳужумчи келадиган бўлса, “Локомотив” мавсумнинг қолган қисмида керакли очколарни қўлга киритиши мумкин.

- Таркибда ўзгаришлар юз берадими? Кимлар тарк этди? Иккинчи давра учун қандай ўзгариш бўлади?

- Йўқ, мухлислар кутган ўзгаришлар бўлмайди. Фақат таркибга икки-уч нафар футболчини жалб этсак керак.

- Эшитишимча, Диёр Туропов “Локомотив”дан кетибди, шу ростми?

- Ҳа, у “Навбаҳор”га кўчиб ўтди.

- Бу аниқ маълумотми?

- Мен шуни биламан холос.

- Жасур Жалолиддинов ҳам жамоага қайтдими?

- Ҳа, менга унинг биз билан бирга бўлишини айтишди.

- Сир бўлмаса, клубни яна кимлар тарк этди?

- Ҳозирча ҳеч ким. Бу хусусида нима деб жавоб беришни ҳам билмайман. Негаки, боя айтганимдек, ҳаммаси мавҳум бўлиб турибди. Эртага бўлиб ўтадиган йиғилишда клубдан ким кетишию, кимлар қолиши ойдинлашса керак.

- Агар клуб эртанги йиғилишда сизни истеъфога чиқарса, буни қандай қабул қиласиз?

- Ҳар қандай ҳолатда ҳам “Локомотив”га мухлислик қилиб қолавераман. Сизга савол берсам майлими?

- Албатта.

- Сиз “Локомотив”да мен томондан олиб борилган ишга қандай баҳо берасиз? Таркибни инобатга олганда ва клуб айни пайтда мусобақа жадвалида 8-ўринни эгаллаб турган бир пайтда менинг кетишим адолатдан бўлади, деб ҳисоблайсизми?

- Сиз “Локомотив”да қолишингиз керак. Чунки жамоанинг ўйини бор.

Кўриб турганингиздек, шунақа гаплар. Коростиченко ҳам вазиятдан бехабар ва эртага барчаси ойдинлашади. Бироқ унинг саволидан шуни англаш мумкинки, агар “Локомотив”дан кетадиган бўлса, бу ҳолат унга бироз оғир ботадиганга ўхшаяпти. Воқеалар ривожини кузатишда давом этамиз.