Файзуллаевга янги мавсум учун иккита вариант “таклиф” қилишди!
Россия чемпионати совриндори ва мамлакат кубоги соҳиби – ЦСКА кутилмаганда бош мураббийни ўзгартиришига тўғри келди. Жамоа ўйини ва натижаларида ўзгариш ясай олган сербиялик мураббий Марко Николич Грецияга йўл олди.
Москва клуби тезкор равишда унинг ўрнига швейцариялик Фабио Челестинини олиб келди. Энди бу мутахассис жамоани ўзига мослаштиришга ҳаракат қилади. Бу жараёнда Аббосбек Файзуллаев яна янги синовлардан ўтишига тўғри келади.
Россия футбол жамоатчилиги, экспертлар, журналистлар янги устоз қўл остида “армиячилар” ўйини қандай бўлишини таҳлил ва тахмин қилмоқда. Бу бевосита Ўзбекистон миллий терма жамоаси ҳужумкор футболчиси Аббосбек Файзуллаевнинг фаолиятига ҳам таъсир ўтказишини инобатга олиб, sports.uz портали ушбу таҳлилий материалларни ўзбекистонлик футбол ишқибозлари эътиборига ҳавола этади.
- ЦСКАнинг швейцариялик мураббийи асосан 4-3-3 ва 4-2-3-1 ўйин схемаларидан фойдаланади. Шу боис, Фабио Челестини олдинги чизиққа янги ўйинчиларни олиб келишни сўраяпти. Чунки якунланган мавсумда Секу Койта, Тамерлан Мусаев, Аллерандро ва Сауль Гуарирапа кутилган самарадорликни намойиш қила олмади. “Армиячилар” ҳужумга “Ахмат”дан чемпионатнинг энг зўр дриблинг устуси Лечи Садулаевни олиб келадиган бўлди.
Бундан ташқари, Челестини Бразилиянинг “Сан-Паулу” клубидан 20 ёшли Матеус Алвесни олиб келмоқчи. Бу футболчи Неймарга ўхшаб ўйнайди. Жуда кўп таваккал қилиши туфайли мураббийлар томонидан танқид қилинади. Бироқ Фабио Челестини уни ЦСКАга олиб келиб, эркин ўйнаши учун имконият яратиб бермоқчи.
ЦСКА мутасаддилари Матеус Алвеснинг ҳеч ким пайқамаган қирраларини кашф қилмоқчи. “Армиячилар” худди шу ишни Аббосбек Файзуллаевга ҳам қўллаган. Европанинг энг кучли лигаларидаги катта клубларнинг энг зўр скаутлари ҳам ўзбк футболчисининг ноёб иқтидорини ўз вақтида кўра олмаган. ЦСКА бразилиялик ўйинчи борасида ҳам Файзуллаевни трансфер қилгандек таваккалга қўл урмоқчи.
Трансферлар учун клубга пул керак. Жамоанинг тажрибали ўйинчиларидан Миралем Пьянич ва Рифат Жемалетдинов кетди. Уларнинг ўрнини янги келадиган Садулаев ва Алвесга беришни мўлжаллашмоқда.
Агар Ўзбекистон миллий терма жамоаси ўйинчиси Аббосбек Файзуллаев ҳам шу ёзнинг ўзида Москвани тарк этадиган бўлса, унинг ўрнига ҳам футболчи топиш зарурати туғилади.
Ўзбекистон илк бор жаҳон чемпионатига чиқди. Файзуллаев ана шу терма жамоанинг энг асосий талантларидан бири. Бир йил аввал унга жиддий клублар, хусусан, “Бавария” ҳам қизиқиш билдирган эди. Бироқ қишда ЦСКА ўйин схемасини ўзгартирганида айнан Аббос зарар кўрди. Марко Николич шундай схема қўлладики, унда Аббоснинг ўйини пасайди, аксинча бошқа футболчилар ўзини кўрсата олди.
Энди Файзуллаев олдида иккита вариант турибди. Биринчи ҳолатда, янги мураббий Челестини Аббосга ишонч билдириб, унга ўзи қўллайдиган ўйин схемаларида футболчига ўйнаш қулай бўлган позиця ва муҳим роллардан бирини бериши керак. Иккинчи вазиятда эса, истеъдодли ёш футболчи хориж клублари билан музокараларни кучайтиради.
Журналистлар клуб вакилларидан трансфер режалари ҳақида сўраганида, мутасаддилар “айни пайтда бунақа ташаббус йўқ” қабилида мавҳум жавоб беради. Туркиянинг “Башакшеҳир” клуби ҳам Аббосбек Файзуллаев ва “Локомотив” футболчиси Баринов трансфери бўйича музокаралар ҳақидаги саволларга шундай жавоб қайтарди. Улар ҳозирча бундай ташаббус йўқ, деб туриб, икки ҳафтадан кейин Москвадан келган икки ўйинчининг тақдимотини ўтказиши ҳам мумкин. Нима бўлганда ҳам, трансфер ҳақида гап чиқа бошлагани Файзуллаевнинг агентлари бу йўналишда ишлаётганидан далолат беради, - деб ёзмоқда soccer.ru сайти эксперти Роман Новиков.
Эслатиб ўтамиз, Аббосбек Файзуллаев 2023 йилнинг августида “Пахтакор”дан ЦСКАга кўчиб ўтган эди. 21 ёшли ҳужумкор футболчимиз ҳозирга қадар “армиячилар” сафида барча турнирларда 71 та учрашувда майдонга тушиб, рақиблар дарвозасини саккиз маротаба ишғол қилган ва жамоадошларига 22 та голли пас узатган.
Transfermarkt портали томонидан 8 миллион еврога баҳоланаётган Файзуллаевнинг Москва клуби билан тузган шартномаси 2026 йилнинг 30 июнига қадар давом этади.
Comments
узинглар уйлаб топиб таклифларни хаёлан бердинглар-ми?