Машҳур клуб Шомуродов трансферини кутмоқда
Италия чемпионатининг янги мавсумига тайёргарлик кўраётган мамлакатнинг энг кучли клублари ёзги трансферлар даврида ўз таркибини тартибга солиш сиёсатини юритмоқда.
Янги бош мураббий Жан Пьеро Гасперини бошқарувига ўтган “Рома” ҳам таркибдаги ўйинчилар якунланган мавсумни бешинчи ўринда тугатганига қарамай, жамоада жиддий ўзгаришлар қилишга бел боғлаган.
Айни пайтда жамоадан кетиши кутилаётган ўйинчилар орасида энг кўп муҳокама қилинаётган футболчи Элдор Шомуродов бўлиб турибди. Ўзбек легионери римликларнинг энг харидоргир активларидан ҳисобланади.
Мавсумнинг иккинчи ярмини юқори даражада ўтказган Элдор Шомуродовни айни пайтда уч клуб талашяпти. Хусусан, Ўзбекистон миллий терма жамоаси ҳужумчиси учун 8 миллион евро миқдорида бадал пули таклиф қилган Туркиянинг “Башакшеҳир” клубини четга суриб қўйган жамоалар чиқди.
Франциянинг “Ренн” клуби мутасаддилари ҳам Римдаги ҳамкасбларини ўзбек легионери трансфери бўйича музокараларга чорлаяпти. Улар Шомуродовга “топ-5” лигаларидан ҳисобланган Франция чемпионатида мунтазам ўйин амалиёти беришга тайёр.
Сўнгги маълумотларга қараганда, Шомуродов учун курашда А Серия дебютанти “Кремонезе” фаворитга айланди. Бунга Элдор ўзи кўниккан Италия чемпионатида қолишни маъқул кўраётгани асос бўлмоқда. Гарчи “Кремонезе” клуби спорт директори Симоне Жакетта ўзбек ҳужумчисига жамоа томонидан қизиқиш йўқлигини айтган бўлса-да, унинг бу гаплари чалғитувчи одатий усул сифатида қабул қилинди.
Қатор манбалар ўзларининг клублардаги инсайдерлари орқали “Кремонезе” Шомуродов трансфери бўйича “Рома” билан музокара ўтказаётгани ва алоқалар ижобий руҳда давом этаётганини ёзмоқда.
Яна бир жиҳат шуки, Элдор Шомуродовнинг Италиядаги биринчи клуби “Женоа” футболчининг навбатдаги трансферини интизорлик билан кутмоқда. Бу масала Генуя ва Рим клубларининг 2021 йилнинг ёзида ўзбек футболчиси трансфери бўйича тузган шартномасига бориб тақалади. Вазият ҳақида romaforever.it маълумот чиқарди.
- “Рома”да жамадонларини тайёрлаб қўйган ва бошқа клубга ўтиш имкониятини кутаётган кўп футболчилар бор. Улар орасида Элдор Шомуродовни ҳам кўришимиз мумкин. Ўтган мавсумнинг иккинчи ярмида Клаудио Раньери қўл остида ажойиб ўйин кўрсатган ўзбек футболчиси Италия ва хориждан бир неча клублар эътиборини тортмоқда.
Ҳозирнинг ўзида Шомуродовга “Ренн”, “Башакшеҳир” ва “Кремонезе” даъвогарлик қилмоқда. Сўнгги маълумотларга кўра, Италия клуби ҳужумчини олиш учун жуда яқин келди. Айни пайтда римликлар А Серия дебютантидан расмий таклиф кутяпти.
“Ренн” эса, асосий нишон сифатида белгиланган ўзбек футболчисини қўлга киритиш учун таркибдан бирор ўйинчининг сотилишини кутмоқда. Римга таклифини жўнатиб қўйган “Башакшеҳир” эса, “Рома” якуний қарор қабул қилгунича, бошқа трансферлар имкониятини ўрганишга киришиб кетди.
Элдор Шомуродовнинг бошқа клубга трансфер бўлишини “Женоа” ҳам интизорлик билан кутмоқда. 2021 йилнинг ёзида мураккаб келишув тузилган. Бадал пули ва турли бонуслардан ташқари генуяликлар ўзбек ҳужумчисининг кейинги трансферидан ўн фоиз улуш ҳам олиши белгиланган. “Рома” Шомуродовни бошқа клубга трансфер қилганидан кейин “Женоа”нинг улушини тўлаб қўйиши талаб этилади, - деб ёзмоқда romaforever.it сайти эксперти Ягоб Паглиара.
Файзуллаевга янги мавсум учун иккита вариант “таклиф” қилишди!
Фикрлар