Каннаваронинг ёрдамчи мураббийлари ким ва улар аввал қайси клубларда фаолият олиб борган?

Ўзбекистон миллий терма жамоаси бош мураббийи Фабио Каннавaро ўзининг тажрибали мураббийлар штаби билан ишламоқда. Италиялик мутахассиснинг жамоасида ҳар бири ўз йўналишида катта тажрибага эга мутахассислар бор. Қуйида улар ҳақида батафсил танишинг.

 Эуженио Албарелла — жисмоний тайёргарлик бўйича мураббий
1965 йилда Италиянинг Неаполь шаҳрида туғилган. У 2010 йилда “Ювентус” клубида фаолият олиб борган. Орадан бир йил ўтиб, Алберто Заккеронининг мураббийлар штабига қўшилиб, Япония терма жамоаси билан 2011 йилги Осиё кубогида ғолибликни нишонлаган.
2016 йилда Хитойнинг “Бейжинг Гоан” клубида ишлаган — ўша пайтда жамоа сафида ўзбекистонлик Егор Кримец ҳам тўп сурган.
2023–2024 йилларда Фабио Каннавaро билан бирга Италиянинг “Удинезе” клубида ишлаган, кейинчалик Хорватиянинг “Динамо Загреб” жамоасида ҳам фаолият олиб борган.

 Антонио Кименти — дарвозабонлар мураббийи
1970 йил 30 июнь куни Италиянинг Бари шаҳрида туғилган. Собиқ профессионал дарвозабон сифатида “Рома”, “Лечче”, “Кальяри”, “Удинезе” ва “Ювентус” каби клубларда ўйнаган. “Ювентус” сафида у афсонавий Жанлуижи Буффондан кейинги иккинчи рақамли дарвозабон сифатида танилган.
Мураббийлик фаолиятини “Ювентус” ёшлар жамоасида бошлаган. Шундан сўнг “СПАЛ”, “Сампдория” ва Италия U-21 терма жамоасида дарвозабонлар мураббийи бўлиб ишлаган.

 Франческо Тройзе — ёрдамчи мураббий
1972 йил 5 февралда Италиянинг Неаполь шаҳрида туғилган. УЕФАнинг A тоифадаги мураббийлик лицензиясига эга. Футболчилик фаолиятини “Наполи” ёшлар жамоаси, “Казеле” ва “Потенца” клубларида ўтказган.
Мураббийлик фаолиятини 2013 йилда “Кьево” ва “Уотфорд” клубларида Жузеппе Саннинонинг ёрдамчиси сифатида бошлаган. Кейинчалик “Катания”, “Ан-Наср”, “Гуанжоу Эвергранд”, “Беневенто”, “Удинезе” ва “Динамо Загреб” жамоаларида фаолият юритган.
Тройзе 2016 йилдан бери Фабио Каннавaро билан бир штабда ишлаб келмоқда.