«Реал» футболчилари ўз-ўзига жароҳат етказяпти?! Шу ростми?

Эден Азар, Дани Карвахаль, Серхио Рамос, Марсело, Федерико Вальверде, Альваро Одриосола. Бу йигитлар ҳозир «Реал»нинг лазаретида эканлигидан хабарингиз бор. Сўнгги пайтларда «қаймоқранглилар» сафида жароҳат олганлар сони ортиб кетиши, мухлислар томонидан кескин танқид остига олинган. Улар клуб футболчиларини машғулотлар чоғида керагидан ортиқ юклама олгани бунга асосий сабаб деб ҳисобламоқда.

Айниқса, клубнинг ижтимоий тармоқларида, шу мавзу асосида ёзилган "негатив коммент"лар сони бир миллиондан ортиб кетди. Аслида, қизиққон испан мухлислари учун бу одатий ҳол. Улар Мадрид жамоасини қўллаб-қувватлаши ва танқид қилиши мумкин, аммо ушбу видео омма юзини кўргач, мухлислар «Реал»нинг жисмоний тайёргарлигига жавоб берувчи мураббийларни кескин танқид қилишни бошлади.

Футболчиларнинг ушбу тренажерда бироз ўзгача машқ қилаётгани сизга ғалати туюлган бўлиши мумкин. Кўплаб мутахассислар ҳам айнан ушбу жисмоний машқлар ҳақида ўз фикрини билдирди.

Аслида, ушбу машқнинг классик кўриниши бундай:

«Реал» мухлислари видеони томоша қилгач, нотўғри  ўтказилаётган машғулотлар сабабли, футболчилар жароҳат олмоқда, деган хаёлга келиб қолгани рост. Аслида ҳам шундайми?!

Умуман олганда, барчаси мухлислар ўйлаганидек эмас. «Қироллик клуби» футболчиларининг ҳар бири ўзи учун белгиланган нормадаги машқларни бажаради. Уларнинг жисмоний ҳолати, майдондаги позициясига қараб юкламалар берилади. Сиз юқорида кўрган видеодаги машқ аслида тизза ва болдир суякларининг мустаҳкам бўлиши учун татбиқ этилган. Бошқа спортчилар оёқ суякларининг маҳкамроқ бўлиши учун кўпроқ штанга билан ўтириб-туришни афзал кўради.

Бу машқлар, асосан, футболчиларнинг майдондаги тезлигини ошириш учун ўйлаб топилган бўлиб, уни мураббийлар полиметрика, деб аташади. Мутахассисларнинг маълум қилишича, ушбу машқ давомида оёқ мушакларининг барчаси юклама олади. Полиметрикани меъёрида бажариш, 30 ёшдан кейин суякдаги заифликнинг олдини олади. Шу йўсинда, ёши каттароқ футболчилар тезлик пасайиб кетмаслиги учун полиметрикага мурожаат этади.

Бундай машқ қилиш чоғида, тизза суякларида муаммолар юзага келмайдими? Ўринли савол. Оддий инсонлар учун бу машқ жароҳат етказиши мумкин, бироқ профессионал футболчиларнинг организми буни бемалол кўтара олади. Уларда юкламаларга шаклланган иммунитет мавжуд. Эътибор берган бўлсангиз, футболчилар тиззасини охиригача букмаяпти. Шу йўсинда, улар жароҳат олишдан ўзларини эҳтиёт қилмоқда.

Таниқли фитнес мураббийларининг маълум қилишича, ушбу машқлар футболчиларни иккинчи қаватда фаол бўлиши ва қисқа масофага катта тезлик кўрсатиши учун жуда ҳам фойдали. Умуман олганда, клуб мухлислар ўйлаганидек, нотўғри машғулот ўтказмаяпти.

«Реал»нинг жисмоний тайёргарлигига жавоб берувчи мураббий ким?

erkogkerogker

Грегори Дюпон ҳақида эшитмаган бўлишингиз мумкин, бироқ у яқиндагина Францияни ЖЧда ғалаба қозониши учун катта ҳисса қўшганлардан бири саналади. Дидье Дешамнинг штабида фаолият олиб борган Дюпон, аввалроқ, «Лилль» билан Франция чемпионлигини қўлга киритган. Айнан у Эден Азарни янги даражага кўтарилишига ёрдам берган.

Уни Зиданга шахсан Дешам тавсия қилган. Дюпонни футбол оламида «олим», деб аташади. Гап шундаки, Грегори Ливерпуль шаҳридаги спорт университетида дарс беради. Бундан ташқари, Грегори УЕФАнинг жароҳатларга қарши курашувчи бўлимида фаолият олиб боради.

«Ҳозирда футбол учрашувларининг қиймати ортиб кетган. Ҳар бир ўйин яхшигина даромад келтирмоқда. Шу боис, футболчилар иштирок этиши керак бўлган учрашувлар сони ортиб бормоқда. Профессионал футболчининг организми тўлиқ тикланиши учун 72 соат керак бўлади. Агар бу қоидага риоя қилинмаса, улар йил мобайнида камида икки бор жароҳат олиши аниқ».

kgweokweogk

Дюпон нафақат машғулотлар, балки ўз жамоаси аъзоларининг рационларини ҳам белгилаб беради. Қандай маҳсулотларни қайси пайтда истеъмол қилиш кераклигини ҳам у белгилаб бериши шарт. ЖЧ олдидан Дюпон сўнгги рўйхатга киритилган футболчиларнинг барчасига қандай таомлар мумкин, қайси бири мумкин эмаслиги ҳақидаги 14 бетли қўлланма тарқатиб чиққан. Мутахассис, шогирдлари 10 соат ухлаши учун уларнинг меҳмонхонадаги хоналарини ҳам ўзи танлаб беради.

Франция терма жамоаси футболчиларининг айтишича, у кун давомида ичилган сувларнинг ҳароратини ҳам белгилаб беришга одатланган. Дюпон ўз ишининг чинакам устаси. У кичик деталларни ҳам кўздан қочирмайди. Ўзи ҳам соғлом турмуш тарзини тарғиб қилувчилардан. Қаҳрамонимиз ҳар куни соат 5:30 да уйғонади ва кун давомида велосипедда 40 км йўлни босиб ўтади.

Ўтган ёзда «Реал»га келган мураббий, пандемия чоғида ҳам жим ўтирмади. У клубнинг ҳар бир аъзоси билан онлайн курс ўтказди ва уларга қандай машқларни бажариш борасида кўрсатма бериб турди. Чемпионат ўйинлари яна давом этгач, «Реал» барча учрашувларни ғалаба билан якунлади ва чемпионликни «Барселона»дан тортиб олди. Бундан кўриниб турибдики, клуб мухлислари хавотир олмаса ҳам бўлади. Футболчилар ишончли қўлларда.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар