Юлдузлардан таркиб топган терма жамоа жаҳон чемпионатидан қуруқ қолди

Африканинг энг кучли терма жамоаларидан ҳисобланган Нигерия 2026 йили АҚШ, Канада ва Мексика мезбонлик қиладигани навбатдаги жаҳон чемпионатига чиқиш имкониятидан мосуво бўлди.

Африка минтақаси саралаш турнири плей-офф босқичи финалида нигерияликлар Конго Демократик Республикаси билан куч синашди. Ўйиннинг асосий вақтида кучлар тенг келди – 1:1. Пенальтилар сериясида эса, Нигерия рақибга 3:4 ҳисобида ютқазди.

Нигерияликлар 2022 йилги жаҳон чемпионатининг финал қисмига чиқа олмаган эди.

Қизиғи шундаки, Нигерия  Африканинг энг қиммат таркибга эга терма жамоаларидан ҳисобланади. Transfermarkt портали бу жамоанинг умумий қийматини 300 миллион еврога баҳолаган.

Бу терма жамоа шарафини Виктор Осимхен, Виктор Бонифасе, Адемола Лукман, Алекс Ивоби, Самуэль Чуквуэзе, Вильфред Ндиди, Рафаэль Оньедика, Калвин Басси каби машҳур ўйинчилар ҳимоя қилмоқда.

Ана шундай юлдузли жамоани саралашдан чиқариб юборган Конго Демократик Республикаси терма жамоаси 2026 йилги жаҳон чемпионатига чиқиш учун халқаро плей-офф учрашувларида қатнашади.