11 нафар футболчи кетиб қолди

Якунланган мавсумда Англия Премьер-лигасини тарк этган “Лестер Сити” келаси мавсум олдидан таркибини қайта шакллантиришига тўғри келади.

Англия матбуотининг ёзишича, “тулкилар” сафини жами 11 нафар футболчи тарк этди. Жамоа юлдузи ва тўпурари Жейми Варди, дарвозабонлардан Даниэль Лённ Иверсен ҳамда Дэнни Уорднинг шартнома якунланди. Уларга янги битим берилмайди.

 Шунингдек, клуб таркибидаги ёшлар жамоасидан саккиз нафар футболчи ҳам нарсаларини йиғиштириб кетди. Хусусан, Оливер Юинг, Харви-Годсмарк-Форд, Бен Грист, Дениш Хилл, Лиэм Макэлинни, Аржан Райкхи, Жозеф Уормлейтон ва Брэд Янг асосий жамоага ўтиш учун курашмасдан, омадини бошқа жойлардан қидирадиган бўлди.

Маълумки, “Лестер Сити” Англия Премьер-лигасини 18-ўринда якунлади ва келаси мавсумни Чемпионшипда бошлайдиган бўлди.