14 ёшли туркиялик гроссмейстер шахмат тарихида янги рекорд ўрнатди

14 ёшли Турк шахматчиси Ягиз Каан Эрдогмуш классик рейтингда 2700 очко чегарасини босиб ўтган энг ёш шахматчига айланди.

12–17 апрель кунлари Монакода ўтган "Авлодлар жангги" серияси доирасида у 51 ёшли гроссмейстер Веселин Топаловга қарши баҳс олиб борди. Учрашувда ҳал қилувчи палла иккинчи партияга тўғри келди — мураккаб курашда Топалов жиддий хатога йўл қўйиб, мағлуб бўлди.

Шундан сўнг баҳсда устунлик тўлиқ ёш истеъдод томонига ўтди: Эрдогмуш учинчи партияда ҳам ғалаба қозонди, тўртинчи партия дуранг билан якунланди ва якунда у яна икки бор рақибидан устун келди. Якуний ҳисоб — 5:1.

Ушбу натижа орқали Эрдогмуш 22 рейтинг очкосини қўлга киритиб, 2700 маррадан ошди. Шу тариқа у мазкур кўрсаткичга эришган энг ёш шахматчига айланди. Аввал бу рекорд Вэй Ига тегишли эди, аммо турк шахматчиси уни қарийб бир йилга янгилади.