16-тур, 16 август ва 16 очколик жамоалар ёхуд 2-даврани 2 та мағлубият билан бошлаган "Бунёдкор" "Локомотив" майдонида 8 йилдан бери ютолмаяпти!

Суперлиганинг 16-турида навбатдаги ўйинлар давом эттирилади. Жумладан, 16 август санасида Тошкент дербисида “Локомотив” ҳамда “Бунёдкор” ўзаро беллашади.

Ҳозиргача жамоалар 32 марта тўқнаш келишган. Ўртада айтарли катта фарқ йўқ. “Локомоив” ҳисобида 11 та, “Бунёдкор”да эса 13 та ғалаба бор. 8 та баҳсда кучлар тенг келган. “Локомотив” 40 та гол уриб, ўз дарвозасидан 45 та тўп олиб чиққан. Биринчи даврада “Бунёдкор” ўз майдонида “темирйўлчилар”ни 2:1 ҳисобида мағлуб этди.

Эътиборлиси, “Бунёдкор” 8 йилдан бери “Локомотив” майдонида ғалаба қозона олмаяпти. Охирги марта 2014 йили сафардан 1:2 ҳисобидаги ғалаба билан қайтган.

Айни пайтда иккала клуб 16 очко билан 9 ва 10-ўринларни бўлишиб туришибди. “Локо”дан фарқли ўлароқ, “Бунёдкор” иккинчи даврани иккита мағлубият билан бошлади. Ғалаба учун қаттиқ жанг кечиши аниқ.