2025 йил учун меҳнат шартномаларида маошнинг минимал суммаси белгиланди

2025 йил учун меҳнат шартномаларида маошнинг минимал суммаси белгиланди.

Аввалроқ Лига ҳамда Уюшма мазкур масалада Ассоциацияга мурожаат қилган бўлиб, иш кўриб чиқилгунига қадар Лига меҳнатга ҳақ тўлашнинг энг кам миқдорининг беш баробаригача бўлган меҳнат шартномаларини рўйхатдан ўтказмасликка қарор қилганди.

12 декабрь куни уч ташкилот иштирокида йиғилиш бўлиб ўтди. Унда 2025 йилги мавсумда клуб ва футболчи ўртасида имзоланадиган меҳнат шартномаларида кўрсатиладиган иш ҳақининг минимал суммаси масаласида келишувга эришилди. Қарор 13 декабрь куни ЎФА биринчи вице-президенти томонидан имзоланди.

Келишувга кўра, Суперлига ва аёллар Олий лигаси иштирокчиси бўлган клуб ўз футболчиси билан меҳнатга ҳақ тўлашнинг энг кам миқдорининг тўрт баробаридан кам бўлмаган суммада меҳнат шартномаси имзолаган тақдирдагина, мазкур шартнома Лига рўйхатидан ўтказилиши белгиланди. Яъни, Суперлига ва аёллар Олий лигасида майдонга тушадиган футболчи ва клуб ўртасида энг камида 4 млн 620 минг сўм ойлик маош кўрсатилган меҳнат шартномаси тузилиши керак бўлади.

Пролига ва аёллар Биринчи лигасида эса минимал сумма меҳнатга ҳақ тўлашнинг энг кам миқдорининг икки баробаридан кам бўлмаган ҳолатда этиб белгиланди. Яъни, Пролига ёки аёллар Биринчи лигаси иштирокчиси бўлган клуб ва футболчи ўртасида энг камида 2 млн 310 минг сўм ойлик маош кўрсатилган меҳнат шартномаси тузилиши талаб этилади.

Ўзбекистон Республикасида меҳнатга ҳақ тўлашнинг энг кам миқдори ўзгарса, шу кундан бошлаб имзоланадиган меҳнат шартномалари учун минимал сумма ҳам ўзгариб боради. Шунингдек, бунга қадар Лига рўйхатидан ўтказилган ва шартномада кўрсатилган сумма мазкур қарордаги минимал суммадан камроқ бўлган меҳнат шартномаларига клуб томонидан ўзгартириш киритилади. 

Ассоциация, Лига ҳамда Уюшма "Футболчилар мақоми ва трансфери бўйича регламент"даги профессионал ва ҳаваскор футболчилар мақоми, машғулот компенсациялари ва уларни тўлаш тартибларини қайта кўриб чиқиб, унга ўзгартириш ва қўшимчалар киритади. Меҳнатга ҳақ тўлашнинг энг кам миқдори масаласи мазкур ўзгаришлар асосида 2025 йилги мавсум сўнгида қайта кўриб чиқилади.

ЎзПФЛ Матбуот хизмати