22 yoshli Olimpiada chempioni faoliyatini yakunladi

100 metrga suzish bo‘yicha London Olimpiadasi chempioni litvalik Ruta Meylutite 22 yoshida faoliyatini yakunladi. Bu haqida sportchining o‘zi ma’lum qilmoqda. 

"Hayotimda yangi sahifa ochishim kerak. Suzish uchun borimni berdim. Qancha bo‘lsa ham shu sport ichida yashadim. Ana endi murakkab mashg‘ulotlar rejimidan holi dam olmoqchiman. Dunyo ko‘rishni va atrofimdagi voqeliklarga chetdan nazar tashlashni istayman", – deydi sportchining o‘zi. 

Ruta ayni paytgacha 3 marta topshirilishi kerak bo‘lgan doping-testiga kelmagan. Agar faoliyatini tugatmaganida, uni 2 yillik diskvalifikatsiya kutib turardi. Ma’lumot uchun, Ruta Meylutite 15 yoshida London Olimpiadasi chempioni bo‘lib, ko‘pchilik mutaxassislarning e’tiboriga tushgan edi. Biroq 2015 yildan so‘ng faoliyatida keskin pasayish kuzatilgan.