9 нафар легионеримизнинг бошқа чемпионатдаги фаолияти бошланди. У ерда ўзбекистонлик бош мураббий ҳам бор!

Қўшни мамлакат – Тожикистон чемпионатида янги мавсумга старт берилди. Мухлисларимиз тожик футболидан ўзига яраша маълумотларга эга. Чунки ҳар йили у ерда бир қатор ҳамюртларимиз тўп суришаётганини эшитамиз ва ўз навбатида бизнинг чемпионатга ҳам тожикистонлик легионерлар таклиф қилиниб келинади. Бу анъана жорий йилда ҳам кузатилди.

Тожикистон олий лигасида 10 та жамоа иштирок этади. Ҳамма яхши билади, у ерда Душанбенинг “Истиқлол” клуби биринчи рақамли чемпион жамоа ҳисобланади. Қолганларнинг унга рақобатлашиши жуда қийин. “Хўжанд” “Истиқлол”дан кейинги иккинчи рақамли жамоа деб эътироф этилади.

Ҳамма вақт тожик клубларининг ўзбек футболчиларига эҳтиёжи бўлиб келган. Шунинг учун ҳар йили бир қатор ўйинчиларимиз қўшни чемпионатда пайдо бўладилар. Бу сафар ҳам шундай бўлди. Янги мавсум олдидан Тожикистоннинг 6 та жамоаси ўзбекистонлик футболчилар билан шартномалар имзолади.

Қолаверса, юртимиздан келган бош мураббий ҳам бор. “Куктош” клуби раҳбарияти янги мавсум олдидан бош мураббийлик лавозимига Абдужаббор Маъруфалиевни таклиф қилишди. У “Металлург”да узоқ вақт ишлаган ва мухлисларимиз яхши билган Абдуқаҳҳор Маъруфалиевнинг укасидир.

Ёдингизда бўлса, ўтган йилнинг иккинчи ярмида “Истаравшан” жамоасига ҳамюртимиз Нўъмон Ҳасанов таклиф қилинганди ва олий лигада бош мураббийлик фаолиятини олиб борган. Энди эса Маъруфалиев “Куктош”ни бошқаришга киришди. У эса янги жамоасига ўзбекистонлик футболчилардан иккитаси – Темур Машарипов билан Муҳиддин Одиловни олиб келди. Қолаверса, ўтган йили “Ғиждувон” ва “Бухоро” сафида тўп сурган нигериялик ҳужумчи Сонг Лонгжи ҳам эндиликда “Куктош” шарафини ҳимоя қиляпти.

Энг кўп легионеримиз “Эсхата” клубида. Олимжон Каримов, Шахзод Маъмуржонов ва Санжар Риҳсибоев билан шартнома имзоланган. “Куктош” ҳамда “Эсхата”дан ташқари “Хўжанд”, “Хатлон”, “Файзканд” сингари жамоаларда ҳам ҳамюртларимиз бор.

Тожикистон чемпионатидаги ўзбекистонлик футболчилар

“Хўжанд”: Хушнуд Бозоров (ярим ҳимоячи)

“Хатлон”: Рустам Қўчқоров (ярим ҳимоячи)

“Файзканд”: Зуфар Акбаралиев (ҳимоячи)

“Эсхата”: Олимжон Каримов (ҳимоячи), Шахзод Маъмуржонов, Санжар Рихсибоев (ярим ҳимоячилар)

“Хосилот”: Темур Маматмуродов (ярим ҳимоячи)

“Куктош”: Темур Машарипов (ҳимоячи), Муҳиддин Одилов (ярим ҳимоячи), Абдужаббор Маъруфалиев (бош мураббий).

Кўриб турганингиздек, 9 нафар ўзбекистонлик футболчилар бор ва 1 нафари бош мураббий. Тожик клублари асосан ҳимоя ва ярим ҳимоя чизиғи учун футболчиларимизни таклиф қилишган. Дарвозабон билан ҳужум позициясига вакилларимиздан ҳеч ким йўқ.

Шуҳратбек Жўраев.