"Аякс" европаликлар орзусига айланадиган ҳужумчи топди
Европанинг гранд клубларини маҳоратли футболчилар билан таъминлаб келадиган "Аякс" Бразилиядан келажакда футбол юлдузига айланадиган ҳужумчи топиб келди.
"Аякс" раҳбарияти "Сан-Паулу" ҳужумчиси Давид Нересни олиш учун 12 миллион евро тўлади ва бу сумма футболчининг ўйинига қараб 15 миллионгача кўтарилиши мумкин. Бу трансфер "Аякс" тарихидаги энг қиммат трансферлар рўйхатида иккинчи ўринда қайд этилди. Бунгача амстердамликларнинг энг катта трансфери 16,5 миллион евро бўлиб, 2013 йилда "Херенвен" вакили Миралем Сулаймоний ана шу суммага олинган эди.
19 ёшли Нерес жамоаси билан 2021 йилнинг ёзига қадар амал қиладиган шартнома имзолади. "Сан-Паулу"да тарбияланган ҳужумчи асосий таркибда 2016 йилдан буён тўп сураётган эди. У ўтган мавсумда саккизта ўйинда учта гол урди. Шунингдек, Бразилия ёшлар терма жамоасида беш бор майдонга тушди.
Фикрлар