«Барселона» – «Атлетик» учрашуви ғолиб ва мағлублари ким?

Ла Лиганинг якунига етган навбатдаги турида «Барселона» клуби яна бир бор қоқилди. Каталонияликлар Билбаонинг «Атлетик»ини ўз уйида енга олмади ва 1-1 ҳисобидаги дурангга эришди.

Ушбу дурангдан кейин «кўк-анорранглилар» қаторасига учинчи марта ўйинни ғолиб сифатида тарк эта олмаяпти. Хўш, ушбу учрашув кимлар учун фойда бўлди-ю, кимга зиён?

Ғолиб: Лионель Месси

Месси учрашувнинг стартини захирадан туриб кузатди, бироқ биринчи тайм шуни кўрсатдики жамоа унинг хизматларига жудаям муҳтож. Эрнесто Валверде иккинчи бўлимда ўн дақиқа кутгач бошқа сабри чидамади ва аргентиналик «сеҳрли қуроли»ни жангга ташлади. Месси майдонга тушганидан кейин каталонияликларнинг ҳужумлари жиддийлаша бошлади.

Дастлабки 30 дақиқа ичида Месси бошқа футболчилар 90 дақиқада ҳам эриша олмаган натижаларни кўрсатди. Унинг бир зарбаси дарвоза тўсинига тегди, бошқасини Унай Симон қайтарди, яна бирини эса Оскар Де Маркос қайтарди. Жамоадошларини икки-уч бора хавфли вазиятга чиқарди. Мунирнинг голида эса айнан Лео катта ишни бажарди.

Ушбу ўйин Мессининг «ўнлик» вазифасидаги навбатдаги мастер-класси бўлди, десак муболаға бўлмайди.

Мағлуб: Жерар Пике

«Соқолли»нинг кучига шубҳа билан қараётган бўлсангиз, Пикенинг ўтган ҳафтада кўрсатган ўйинига бир назар ташланг. У Чемпионлар Лигаси доирасида «ПСВ»га қарши «тоза ўйин» ўтказишда бош-қош бўлди. Уч кун ўтиб «Жирона»га қарши ўйинда ажойиб ўйинини ўтказди. Бу муболаға эмас, у «Жирона» дарвозасига боши билан чиройли гол урди.

Бироқ Пике соқолидан қутулганидан кейин унинг ўйинида пасайиш сезиларли бўлди. «Барселона» янги имидждаги Пике билан беш голни ўтказиб юборди. Энг ачинарлиси, бу голларнинг барчаси Пикенинг хатоси билан содир бўлди. Аниқроқ айтганда, «Леганес»нинг биринчи голида унинг қисман хатоси бор эди. Қолган тўрт гол 100 % унинг пала-партиш ўйинидан кейинг содир бўлди.

«Атлетик»ка қарши баҳсда ҳам у жамоадошларидан ортда қолиб кетди ва Де Маркос офсайддан қутулиб гол урди.

Ғолиб: Оскар Де Маркос

Де Маркос ҳужумдаги футболчига айланиб бормоқда. Марсело Бьелса қўли остида «ўнлик» позициясида даврон ураётган футболчи қанот ҳимоясичисига айлантирилди. Энг қизиғи бу иш берди! У ўзи учун янги бўлган позицияда ўйнаб кетолган эди.

Бьелсадан кейин у бироз олдинга силжий бошлаганди. Бироқ айни вақтдаги мураббий Эдуардо Бериццо уни ўнг қанот ҳимоячисига тўлиқ айлантирди. Бериццога кўра Де Маркосда кучли ҳимоячи бўлиш учун барча хусусиятлар етарли экан. Муҳими унинг қанотдан ҳужумларга қўшилиши клуб фойдасига ишламоқда.

Мағлуб: Иван Ракитич

Агарда Ракитич «Барселона» либосида энг ёмон ўйинини ўтказган бўлса, у ҳам «Атлетик»ка қарши ўйин бўлди дейишимиз мумкин. Хорватиялик футболчи одатда Валверденинг энг ишончли футболчиси ҳисобланади. Аммо у ҳимояда ёрдам беришда ва ҳужумдаги ҳиссаси бўйича жамоасига умуман ёрдам бера олмади.

Ҳимояда у «Барселона»га ҳеч қандай ёрдам бермади, одатда у бу ишни аъло даражада бажариб келарди. Тўп билан эса бу сафар саросимага тушиб қолаверди ва имкониятларни бирин-кетин йўққа чиқарди.

Ғолиб: «Реал» & «Атлетико Мадрид»

Мадрид дербисидаги натижага қарамай иккала пойтахт клублари «Барса»нинг ўйинидан фақат ютишди. Боиси Ла Лига пешқадамлигида орадаги фарқлар сезиларли тарзда ўзгармасдан қолмоқда.

«Барселона»нинг дуранги «Реал»га азалий рақиби устидан икки очко ўзиб кетишига имконият туғдирганди. Диего Симеоне шогирдларига эса каталонияликларга етиб олишга шароит яратганди. Айниқса мавсум стартини кучсиз тарзда бошлаган «Атлетико» учун якуний натижалар қониқарли бўлди.

Мағлуб: «Тоттенхем»

«Кўк-анорранглилар» даҳшатли ҳафтани бошидан кечирди. Икки дуранг ва бир мағлубият! Энди улар «Тоттенхем»га қарши саф тортади, бу эса кайфиятни кўтариб олишнинг айни вақти. Валверде эса жамоасида баъзи жабҳаларда ижобий ўзгаришларни қилмоқда.

Аввало, ўтказиб юборилган гол Жерар Пикенинг мантиқсиз хатоси ортидан содир бўлди. «Атлетик» «Камп Ноу» эгаларини қарши-ҳужумлар билан доғда қолдира олмади. Иккинчидан, Валверде жамоага 4-3-3 ўйин схемасини қайтарди. Бунда ярим ҳимоячи Коутиньо чап қанот вингери сифатида ҳам 4-3-3, ҳам 4-2-3-1 ўйин тизимида тўлиқ учрашувни ўтказди.

4-2-3-1 ўйин услубида Месси марказий зонадан ҳимоя мажбуриятларидан озод қилинган ҳолда жой олди. Бунда у ҳақиқий томошабоп ўйин ўтказди. Ушбу учрашувда фақатгина омад «Барселона»дан юз ўгирди. Умуман олганда «Барса» мавсумга кириша бошлаганини кўрдик. «Тоттенхем» «яраланган шер»га қарши ўйнашни истамагани аниқ.