Ҳокимга 49-рақам берилди

10 октябрь, чоршанба куни «Динамо» марказий стадиони анжуманлар залида Самарқанд вилояти ҳокими вазифасини бажарувчи Эркинжон Турдимов «Динамо» профессионал футбол клуби раҳбарияти, мураббийлар, футболчилар, мухлислар ва ОАВ вакиллари билан учрашди. Бу ҳақда клуб расмий сайти хабар бермоқда.

Йиғилишда вилоят ҳокими “Динамо” клубининг жорий йилги мавсумдаги иштирокини танқидий ва таҳлилий тарзда баҳолаб, вилоятнинг бош жамоаси Самарқандга муносиб бўлиши лозимлигини таъкидлади.

“Барчамиз жуда яхши биламиз, Самарқанд аҳли футболсевар халқ. Вилоятнинг қайси бир чеккасига борманг, футбол ҳақида гап очилганида “Динамо”нинг қайд этаётган натижаси одамлар орасида муҳокама қилинаётган бўлади. Самарқандимиз бош жамоасининг жорий йилда кўрсатаётган натижаси шахсан мени вилоят футбол ассоциацияси президенти сифатида қониқтирмаяпти”, – дея таъкидлади Эркинжон Оқбўтаевич.

Йиғилиш давомида “Динамо” клуби раҳбарлари, мураббийлар, футболчилар, журналистлар ва мухлисларнинг таклифларини эшитган Эркинжон Турдимов “Динамо” клуби моддий-техник базасини мустаҳкамлаш, футболчилар ва мураббийлар учун зарур шарт-шароит яратиш ва уларни муносиб рағбатлантиришда кузатилаётган муаммоларни бартараф этиш борасида кўрсатмалар берди.

Хусусан, жамоа машғулотлари учун муносиб ўйингоҳ ва майдон ажратиш, клуб қароргоҳи борасида янги таклиф киритиш, “Динамо” стадионидан фойдаланиш, замонавий автобус харид қилиш ва футболчиларни ўз вақтида рағбатлантириб бориш бўйича чора-тадбирлар белгиланди. Вилоят раҳбари “Динамо”нинг келгуси мавсумда Суперлигада иштирок этиши учун барча имконият яратиб берилишини, бунинг учун жамоа фақат ва фақат ғалабалари билан мухлисларни хурсанд этиши лозимлигини айтиб ўтди.

“Динамо” – мамлакатимизнинг энг кўп аҳолига эга вилояти саналмиш Самарқанднинг бош жамоасидир. “Динамо” бу – Самарқанднинг ўзига хос кўп йиллик бренди. Ёдингизда бўлса, бир неча йил олдин “Динамо” номи ўзгартирилиб, “Афросиёб” ҳам, “Мароқанд” ҳам дея номланганди, аммо клуб ўз тарихи ва анъаналари билан “Динамо” сифатида машҳур. “Динамо” Самарқандга муносиб бўлиши лозим. Ҳозирги натижалар учун мураббий ва футболчиларни ҳозирдан қоралаш ниятим йўқ, сабаби уларга қандай шароит яратилганидан бехабарман. Ҳозирдан “Динамо” клубининг ташкилий ва молиявий йўналишларини белгилаб олишимиз даркор. Бундан буён нафақат “Динамо”, вилоят футболи ҳам имконқадар назоратимда бўлади. Болалар футболини ҳам ривожлантиришимиз керак. Болалар футболидаги муаммо ва камчиликларни бартараф этиб, шароитларни яна бир кўздан кечириш, стадион ва майдонларни яхшилаш борасида ишлар режасини тузишимиз шарт. Болалар ва ўсмирлар футболи бу - пойдевор, бунга жиддий ёндашиш лозим”" – деди вилоят раҳбари.

Йиғилиш якунида Эркинжон Турдимов футболдаги муаммо ва камчиликлар, таклифлар борасида клуб раҳбарияти ва мураббийларни журналистлар ва мухлислар билан доимо очиқ мулоқотга киришишлари лозимлигини, Самарқанд футболи ривожи учун барча бирлашиб бир ёқадан бош чиқариб ҳаракат қилиши шартлигини таъкидлади.

Тадбир якунида “Динамо” бош мураббийи Даврон Файзиев сўзга чиқиб, Эркинжон Турдимовга футбол жонкуяри сифатида қилинаётган катта эътибор учун миннатдорчилик изҳор этиб, билдирилган ишончни оқлаш учун бутун жамоа масъулиятни ҳис этган ҳолда Суперлига йўлланмаси учун курашишини маълум қилди ва вилоят ҳокимига жамоа номидан “Динамо”нинг 49-рақамли либосини совға қилди.