Ким Донг-Хи: “Сўғдиёна”нинг келажаги порлоқ эканлигига ишонганим учун келдим

Ёзги трансферлар вақтида "Сўғдиёна" жамоасига келиб қўшилган Жанубий кореялик ярим ҳимоячи Ким Донг-Хи қисқа фурсатда мухлислар кўнглидан жой олди. Эътиборингизга ушбу футболчи билан суҳбатни тақдим этамиз. Бу ҳақда клуб матбуот хизмати хабар бермоқда. 

“Сўғдиёна”ни танлашингизга нима сабаб бўлди?

- Ўзбекистонда келганимдан хурсандаман. "Сўғдиёна"ни келажаги бор деб ишонаман. Таклиф билан чиқишганида, мен хеч иккиланмай рози бўлдим. Фаолиятимни янги саҳифадан бошлашга қарор қилдим. Бу ер менга ёқди. Инсонлари самимий. Жамоам ҳам, ички муҳит ҳам аъло даражада.

Ўзбек футболи ҳақида аввал эшитган эдингизми? Нима деб ўйлайсиз, Корея билан бизнинг футболни қандай фарқи бор?

- Кореяда ўзбек футболи ҳақида маълумот топиш ва улар билан алоқа ўрнатиш қийин эди. Асосан собиқ жамоадошим Сервер Жепаров орқали билар эдим. “Локомотив” таркибида фаолият олиб борган дўстим Чо Сук Жеэ орқали бироз маълумотга эгаман. Ўзбек футболида интизом жуда қаттиқ бўлиб, ўйинлар худди жанг майдонларига ўхшайди. Корея футболи ҳам деярли шундай. Аммо бу ерда футбол анча шиддатлироқ.

Ким, жамоадошларингиз ва шароитлар сизни қониқтираяптими?

- Бу клуб кўнглимга ёқди. Ҳали Ўзбекистон шароитига тўлиқлигича мослаша олганим йўқ. Тил ва маданиятимизда фарқ борлиги учун бироз қийналаяпман. Тезроқ мослашиб жамоамга фойдам тегишини истайман. Яшаш шарт шароитларим яхши. Жиззах ахолиси жуда меҳрибон.

Бугун ўз майдонимизда Ўзбекистоннинг етакчи жамоаларидан бир “Насаф”ни қабул қиламиз. Бўлажак ўйин олдидан қандай фикрдасиз?

- Ростини айтсам, мен ўзбек клублари ҳақида у даражада кўп маълумотга эга эмасман. Айни кунларда жамоалар ва уларнинг ўйин услуби ҳақида кўпроқ маълумот олишга ҳаракат қилаяпман. Биз бўлажак баҳсга яхши тайёргарлик кўрдик ва ғолиблик учун майдонга чиқамиз. Мезбон сифатида, албатта, мухлисларга ғалаба тақдим этишни истаймиз.

Қисқа вақт ичида жиззахлик мухлислар ёқимтойи бўлиб қолдингиз. Мухлислар ҳақида қандай фикрдасиз ва уларга тилакларингиз.

- Катта эътибор ва қизиқишингиз учун миннатдорчилик билдираман. Мухлисларнинг қўллаб-қувватлаши бизга янада куч беради. Ўйинларда ғалаба қозониш учун барча куч ва меҳнатимизни ишга соламиз. Стадионга кўплаб мухлислар келиб бизни қўллаб-қувватлайди деб умид қиламан ва олдиндан ўз миннатдорчилигимни изҳор этаман.