Олимпия терма жамоаси бош мураббийи: Эски таркибдан нари борса 7-8 футболчи жалб этилади

 "Ҳайрли кун қадрли дўстлар. Шуни таъкидлаш жоиз, мен бир ой олдин бу ерга келиб Ўзбекистон олимпия терма жамоаси режалари билан танишган эдим. Ушбу лойиҳа менда яхши таассурот қолдирди. Ўйлайманки, керакли натижага эриша оламиз.

Бундан олдинги олимпия термаси Осиё чемпиони бўлган. Бу сафарги баҳсларда ўша таркибдан нари борса 7-8 футболчи бўлади. Ўзбекистонлик футболчиларнинг савияси яхши ва шу боис таркибни шакллантиришда қийинчилик бўлмайди деб ўйлайман.

Бизнинг 2 ой вақтимиз бор. Саралаш босқичини ўз уйимизда ўтказамиз ва бор эътибр ана шу мусобақага қаратилган. Насиб этса, вазифани уддалаймиз.

Мураббийлар штабида 2 та сербиялик мутахассис фаолият олиб боради. Мен рус тилини билмайман ва улар орқали футболчилар билан мулоқот қиламан.  Қолаверса Равшан Ҳайдаров ҳам бизга ёрдамлашади. Бир ой олдин улар билан ўзаро гаплашган эдик. Равшан Ҳайдаровнинг маслаҳатларига албатта қулоқ тутилади.

Ўйлашимча, таркибни ташлаб олиш учун етарли мудат деб ўйлайман. Февраль ойида Тошкентда 10 кунлик йиғин ташкил этилади. Сўнгра Испанияда ҳам ўқув-йиғин машғулотлари олиб борилади. Менимча, шунча муддат давомида мусобақага тайёр бўлиш мумкин.

Ҳозирча, шуни айта оламанки, рақиблар ҳақида маълумотлар бор. Мураббийлар штаби шакллантирилмоқда ва ҳали яна бу борада батафсил маълумотлар йиғилади", - деди сербиялик мутахассис.