Ўзбекистон МОҚ делегацияси Япония Олимпия қўмитаси вице-президенти билан учрашув ўтказди

Суҳбат давомида Я. Сайто Япония Олимпия қўмитаси раҳбарияти Ўзбекистон МОҚ томонидан кўрсатилаётган ташаббус ва фаолликни доимо қўллаб-қувватлашга тайёр эканлигини маълум қилди. Шунингдек, у 2018 йилнинг июнь ойида Ўзбекистон МОҚ президенти Умид Аҳмаджоновнинг кунчиқар юртга ташрифи давомида япониялик ҳамкасби Ц.Такеда билан ўтказган учрашуви натижалари ҳақида ҳам гапириб ўтди.

Ўзбекистон МОҚ вице-президенти Комил Рўзиев Япония Олимпия қўмитаси раҳбариятига Умид Аҳмаджонов номидан алангали саломни етказди ва Токио Олимпиадаси олдидан қўйилган мақсад ҳамда вазифаларни амалга оширишга тайёр эканлигини маълум қилди. Бу ҳақда МОҚ расмий сайти хабар бермоқда.

Шунингдек, Комил Рўзиев япониялик ҳамкасбига Ўзбекистон МОҚнинг Япониядаги маслаҳатчиси М.Бахриддиновни таништирди ва Токио 2020 Олимпия ўйинларидаги муваффақият йўлида Ўзбекистоннинг таклиф ва ташаббуслари ҳақида гапириб берди.

Томонлар ҳар икки мамлакат спортчиларини юқори савияли мураббий ва мутахассислар билан биргаликда тайёрлаш масаласини ҳам муҳокама қилдилар. Кейин эса спорт департаменти директори Ясухиро Накамори Ўзбекистон делегацияси вакилларини Олимпия ўйинлари учун тайёрланаётган спорт иншоотлари билан таништирди. МОҚ вакиллари яккакурашлар, жамоавий спорт турлари, теннис ва гимнастикага мўлжалланган спорт залларини кўздан кечирдилар.

Кейинги учрашув эса Токио Олимпия ва Паралимпия ўйинлари ташкилий қўмитаси вакили, Кейо университети профессори Хироюки Ишида билан ўтказилди. Жаноб Ишида учрашув давомида 2018 йилнинг ноябрь ойида Тошкентда спорт тиббиёти бўйича ташкил этилган биринчи халқаро конференция ҳақида гапирди ва ташкилотчилик юқори савияда бўлганлигини қайд этиб ўтди.

Эксперт делегациямиз вакилларини Япония спорт тиббиётида эришилган ютуқлар билан таништирди ва 2019 йилги ҳамкорлик режаси бўйича ўз фикрларини билдирди.