“Роналду эффекти” ёҳуд Игуаин-Бонуччи рокировкаси

Португалиялик суперюлдузнинг “Ювентус”га келиб қўшилиши “Милан” клуби мухлислари томонидан бизнес нуқтайи назаридан мақталган бўлса, туринлик мухлисларнинг ҳавотирлари секин аста бўй кўрсата бошлаганидан янада тушкунликка тушаётган бўлса ажаб эмас.

Роналду келиши ортидан жамоа етакчиси Гонсало Игуаиннинг кетиши борасидаги хабарлар “болалаган” эди. Бу ҳолат ўзини кўп куттирмади. Игуаинг “Милан”га кўчиб ўтди ва бу шартноманинг бир қисми сифатида “Ювентус” собиқ ҳимоячиси Леонардо Бонуччини ортга қайтарди. Шунингдек, Игуаин билан бирга Маттия Калдара ҳам “Милан”га йўл олди.

Бу ҳақиқий бизнес бўлди, десак муболаға бўлмайди. “Россонерилар”нинг хитойлик хўжайини Ли Йонгхонг клубдаги молиявий муаммоларни бартараф қила олмагач, клуб бошқаруви энди Elliot Management Corporation қўлига ўтди.

Миланликлар учун бу айирбошлаш ажойиб бўлди. Энди Романьолига шерик сифатида Италиянинг энг яхши ёш ҳимоячиларидан бири Калдара ҳаракат қилади.

Леонардонинг собиқ клубига қайтиш истаги Игуаинни ҳам мушкулликлардан қутқариб қолди. Фақатгина ҳужумчининг истаги унинг янги жамоасида қанчалик шуҳратга эришишига олиб келиши мумкин.

Криштиану Роналду ҳам ўз навбатида бундай айирбошлашнинг амалга оширилишига мажбурий сабаблардан бири. Португалиялик суперюлдуз Турин клубига солиқлар ва маошлар билан бирга – нақ 340 миллион еврога тушди. Бу албатта клуб ўз бюджетини қайта тақсимлаб, ҳисоблаб чиқишга мажбурлади.

“Кекса синьора”нинг Роналдудан олдинги энг қиммат трансфери Игуаинни клубни тарк этиши нафақат молиявий енгиллик бағишлайди, қолаверса беш карра “Олтин тўп” эгасининг бежанжал марказий ҳужумда ҳукмронлик қилишига шароит яратади.

Спорт ва молиявий нуқтаи назаридан жаҳоннинг энг кучли ҳужумчисини 18 миллион еврога ижарага олиш ва уни кейинги мавсумда 36 миллион евро тўлаб сотиб олиниши “Милан”нинг янги раҳбариятининг дастлабки ютуғи, десак муболаға бўлмайди. Бу 30 ёшли ҳужумчининг мунтазам ўйин амалиётига эга бўлишини ҳам кафолатлайди.

Боиси “Милан”нинг ҳужум чизиғи вакиллари- Андре Сильва ва Никола Калиничлар А Серияда ўтган мавсумда қийинчиликка дуч келишди.  Бу трансфер иккала томон учун ҳам “ғалаба – ғалаба” формуласига монанд келади.

Шунга қарамай, “Юве”нинг Калдарани қўйиб юбориши Бонуччининг ортга қайтарилиши жумбоқ. Хато қилмаслик керак, бу Беппе Маротта томонидан ташланган анча хавфли қадам бўлди. Бу унинг трансфер бозоридаги уддабуронлиги обрўсини тушириб юбормаса бўлгани.

24 ёшли Калдара эндигина А Серия чемпиони сафига келиб қўшилганди. 2017-йил январида у “Аталанта”дан 16 миллион евро эвазига “Ювентус”га кўчиб ўтди. Бироқ унинг ривожланишини истаган “кекса синьора” уни 18 ойга “Бергамо”га ижарага бериб юборди.

Ўтган мавсумда А Серияда Бонуччидан 11 ўйин кам ўтказганига қарамай, Калдаранинг кўрсаткичлари “Милан”ни ҳимоя қилган Бонуччиникидан анча яхши.

Ҳимоя чизиғи вакилларининг ёши ўтиб бораётганига қарамай, “Юве” 24 ёшли Руганини ҳам “Челси”га қўйиб юборди.

Кўриниб турибдики, туринликлар янги мавсумда нима қилиб бўлмасин Чемпионлар Лигаси бош совринини ютиш ниятида. Албатта Роналду саккизинчи марта А Серияни ютишга ёрдам бериши олиб келингани йўқ.

Роналдунинг ўзи ҳам футбол тарихида Чемпионлар Лигасини учта клубда ютган иккинчи футболчига айланиш дардида.

Роналду ва “Юве” буни фақат ҳужумчининг атрофида ишончли, тажрибали футболчиларни тўплаш эвазига амалга оширилиши мумкинлигини тушуниб турибди.

Шунинг учун Бонуччининг ёшига қарамай ортга қайтарилди. Шунинг учун унинг ўзи ҳам ортга қайтишни истади. Улар ажралганига бир йил тўлмай биргаликда янада кучли эканликларини тушуниб етишди.

Эркинжон Ғайбуллаев тайёрлади.