Машҳур ўзбек боксчиси расман WBA қарорига қарши чиқди

Ўзбекистонлик профессионал боксчи Бектемир Мелиқўзиев WBA ўз вазн тоифасидаги чемпионлик жангини ташкил этиш борасида қабул қилинган қарорига норозилик билдирди. 

«Ассалому алайкум, ҳурматли мухлислар.

Мен тушунмаяпман: нима учун WBA ўзининг ўзи қабул қилган қоидаларига амал қилмаяпти?

Бир неча жанг ўтказиб, расман мажбурий даъвогар мақомини қўлга киритдим. WBA ва Golden Boy менга навбатдаги жангим албатта чемпионлик учун бўлишини ваъда қилган эди.

Мендан Хайме Мунгияга йўл беришимни сўрашди, эвазига кейинги жангим албатта чемпионлик жанги бўлишини айтдилар. Энди эса у WBA рейтингининг ҳатто биринчи ўн бешталигига ҳам кирмайдиган рақибга қарши жангга ҳозирланмоқда.

Биз барча талабларга риоя қиламиз, машқ қиламиз, меҳнат қиламиз. Лекин навбат бизга келганда, яна қоидалар четга сурилади. WBA ҳимояси остида 12 та жанг ўтказдим, 4 та саралаш (элиминатор) поедингида ғалаба қозондим ва йиллар давомидаги меҳнатим эвазига шу мақомга эришдим.

Мунгия — чемпион, мен эса — расмий мажбурий даъвогарман. Биздан олдин ҳеч ким навбатга қўйилмаслиги керак. Биз ўртасидаги жанг — энг мантиқий қарор. У ҳам ҳужумкор боксчи, мен ҳам ҳужумкор услубда жанг қиламан. Ўйлайманки, бизнинг жангимиз томошабоп, муросасиз кураш бўлади ва мухлислар буни осонликча унута олмайди. 

Бу жанг Канело — Мбилли кечасида идеал воқеа бўлган бўларди.

Бу тўқнашувда Мексика ва қолган жаҳон вакиллари рингга чиқади. Мен майдонга Ўзбекистон шарафини ҳимоя қилиш учун чиқаман, у эса Мексика шарафини. Иккала мамлакатда ҳам ҳамёшлар, ҳам профессионал бокс мактаби жуда кучли эканига ҳамма гувоҳ.

Ҳар бир боксчини ҳурмат қиламан, лекин энди менинг навбатим келди. Меҳнатим орқали бу имкониятга лойиқман», — дея таъкидлади Бектемир Мелиқўзиев ўзининг Instagram саҳифасида.

Эслатиб ўтамиз, Мелиқўзиев WBA версияси бўйича жаҳон чемпиони унвонини Мексика вакиллари иштирокидаги «Мексикага қарши бутун дунё» шиори остидаги кузги бокс кечасида Хайме Мунгияга қарши жангда қўлга киритиш имкониятига эга бўлиши керак эди. Бироқ бу жанг амалга ошмади. Сабаби — Мунгия жорий йил май ойида Армандо Ресендизга қарши жангда мажбурий ҳимояни ўтказиб бўлгани учун промоутерлар режаси ўзгарди.

Натижада мексикалик чемпион жамоаси бошқа номзодларга эътибор қарата бошлади. Ҳозирча энг эҳтимолий рақиб сифатида америкалик Кевин Ньюман номи тилга олинмоқда.