Sergey Smorodin: Bunday jamoa bilan kamida Evropa Ligasini zabt etish mumkin
Xabaringiz bor, o‘tgan mavsumni Farg‘onaning “Neftchi” klubida o‘tkazgan Sergey Smorodin faoliyatini Ukrainada davom ettiradigan bo‘ldi.
23 yoshli futbolchi odessaliklarning Turkiyadagi yig‘inida ishtirok etib, yakunda “Chernomorets” bilan uzoq yillik shartnoma imzoladi.
Shu munosabat bilan SPORTS.uz internet-axborot portali futbolchi bilan bog‘lanib uning, yangi jamoaga o‘tishi va bu taklif qanday paydo bo‘lgani, shuningdek, oldinga qo‘ygan maqsadlari bilan qiziqdi.
“Chernomorets” haqida qisqacha gapirib bersangiz. “Chernomorets” varianti qanday paydo bo‘ldi?
Turmush o‘rtog‘im bilan Kievga keldik, jamoa murabbiylari men bilan aloqaga chiqdi va Odessaga taklif qilishdi. Keyin mashg‘ulotlarga kirishdim. Yakunda esa o‘rtada o‘zaro kelishuvga erishdik.
Kievga yo‘l olishdan maqsad yangi jamoa topishmidi yoki...
Yo‘q, biz oilamiz bilan shunchaki ta’tilni Ukrainada o‘tkazib yangi yilni o‘sha erda o‘tkazmoqchi edik.
Keyin klub bilan Turkiyaga jo‘nab ketdinglar.U erda mashg‘ulotlar qanday kechdi? Yig‘in davomida nechia o‘yinda maydonga tushdingiz?
Yig‘in davomida asosan jismoniy taraflama tiklanishga e’tibor qaratdik. O‘ylaymanki, bu biz uchun foydali bo‘ldi. Jamoaga keladigan bo‘lsam, yigitlar ancha ahil, va men ikkita o‘yinda maydonga tushdim.
Shuningdek, murabbiylar shtabi ham o‘yinimdan qoniqish hosil qilishdi. Bundan tashqari, klub bosh murabbiyi Aleksandr Babich juda ahil va tartibli jamoa tuzishga muvaffaq bo‘lgan. Bu jamoa bilan kamida Evropa Ligasi yo‘llanmasi uchun kurashish mumkin.
Sobiq jamoangiz “Neftchi” haqida nima deya olasiz?
“Neftchi” klubiga o‘z tashakkurimni bildiraman va kelasi mavsumda ularga omad tilab qolaman!
Yangi jamoaningizda o‘z oldingizga qanday maqsadlarni qo‘ygansiz?
Yangi mavsumda odessaliklarning asosiy tarkibidan o‘rin olib, jamoa bilan kamida Evropa Ligasiga yo‘l olishni maqsad qilganman. O‘ylashimcha, Aleksandr Babich kabi mohir mutaxassis bilan bu maqsadni amalga oshrishim mumkin.
Fikrlar