Гвардиола нега Ҳусановни ўйнатмай қўйди?

Ўзбекистон миллий терма жамоаси марказий ҳимоячиси Абдуқодир Ҳусанов Англия Премьер-лигасининг 30-турида “Лестер”га қарши учрашувда “Манчестер Сити” қайдномасига киритилмади.

2026 йилги жаҳон чемпионати минтақавий саралаш турнирининг Эрон терма жамоасига қарши ўтказилган охирги учрашувда 21 ёшли ҳимоячининг ўз даражасида ўйнай олмагани, Англияга қайтиб, мамлакат кубоги доирасида “Борнмут” билан бўлган баҳснинг танаффусида захирага олингани муҳокамаларга сабаб бўлганди.

Легионеримиз ўйинида кузатилган кичик пасайиш ортидан “Лестер”га қарши беллашувга жалб қилинмагани турлича талқин қилинди. Қизиғи шундаки, Ҳусанов Манчестерга келганидан буён илк маротаба учрашув қайдномасидан ташқарида қолди.

Таниқли журналист Саймон Байковски бу вазиятга ойдинлик киритди. Бу манба Ҳусановнинг қайдномага киритилмагани сабаби жароҳат ёки бошқа омилларга боғлиқ эмаслигини, балки Хосеп Гвардиола Абдуқодирга яхшилаб ҳордиқ чиқариши учун қўшимча шароит яратиб берганини таъкидлади.

Дарҳақиқат, жаҳон чемпионати саралаш турнири доирасида қисқа муддатда иккита оғир ўтказган ва сафар чарчоғидан тўлиқ фориғ бўлмаган ёш ўйинчи учун бу имкониятни айни муддао бўлди, дейиш мумкин.

Таъкидлаш жоизки, аксарият мутахассислар Абдуқодир Ҳусановни “Манчестер Сити”да ёрқин келажак кутиб турганини ва ўзбек легионери тез орада жамоанинг ҳақиқий етакчиларидан бирига айланишини таъкидламоқда.

Хусусан, таниқлик футбол скаути Женк Четин 21 ёшли ўзбек футболчисининг кучли томонларини ва халқаро футбол жамоатчилиги эътиборига қачон тушганини  айтиб ўтди.

- 2023 йили Аргентинада 20 ёшгача бўлган футболчилар иштирокидаги жаҳон чемпионатида Абдуқодир Ҳусанов тўртта учрашувда майдонга тушди. Ўзбек футболчиси ҳаводаги курашларда рақибларига бирорта имконият қолдиргани йўқ.

Ҳусанов куч-қуввати ва жисмоний устунликларидан ташқари тезкор ва чаққон ўйинчи сифатида ўзини кўрсата олди.

Нимчорак финалда Исроилга қарши ўтказилган ўйинда Ҳусанов ўйинни ўқиш қобилияти, позиция танлаш маҳорати, тўпни олиб қўйиш ва рақиб ҳужумчиси билан бирга бир вазиятда қандай ўйнаш бўйича юқори даража намойиш қилди. Абдуқодир рақибнинг Анан Халили ва Тай Абид каби бақувват ва техникаси кучли ҳужумчиларига етарли даражада қарши тура олди.

Ҳусановнинг келажаги ҳақида гапирганда, у Хосеп Гвардиола қўл остида янада юксак даражага чиқишини таъкидлаш лозим. Тил билиш бўйича тўсиқлар бартараф бўлганидан кейин Абдуқодир “Манчестер Стҳити” таркибида энг муҳим фигуралардан бирига айланади, - деди Женк Четин.

  Бундан ташқари, Женк Четин скаут сифатида Марказий Осиёда футбол жадал ривожланаётгани ва бу минтақа футбол бозорида янги рақобатбардош минтақа сифатида намоён бўлаётганига алоҳида эътибор қаратди. Унинг фикрича, Абдуқодир Ҳусанов каби феноменлар таъсирида бу минтақага бўлган қизиқиш янада кучайиб бораверади.

Эслатиб ўтамиз, Абдуқодир Ҳусанов 2025 йилнинг 20 январь уни Франциянинг “Ланс” жамоасидан “Манчестер Сити”клубига жами 50 миллион (40 миллион евро бадал пули + 10 миллион евро бонус)еврога трансфер қилинди. Легионеримизнинг “шаҳарликлар” билан шартномаси 2029 йилнинг ёзигача давом этиши белгиланган. 

Файзуллаевнинг “Бенфика”га трансфери барбод бўлган. Сабаби аниқ...

Агент Файзуллаев Европага қачон кетишини айтди. Манзил фақат ТОП-ЛИГА!