"Шальке" ЕЧЛда ЦСКАнинг 13 йил олдинги натижасини такрорлади

Хабарингиз бор кеча “Шальке” ўз майдонида ЕЧЛ 1/8 финал дастлабки учрашувида “Манчестер Сити”га 3:2 ҳисобида имкониятни бой берди.

Учрашувнинг 68-дақиқасига келиб ҳакам “шаҳарликлар” ҳимоячиси Николас Отамендига қизил карточка кўрсатди ва майдондан четлатди. Шундан сўнг гельзенкирхенликлар бир киши кўп бўлиб 2:1 ҳисобида олдинга чиқиб олишди. Аммо, улар ушбу натижани сақлаб қола олишмади. Ўйиннинг 85-дақиқасидан сўнг шаҳарликлар 2та тўп киритишди ва ғалабани илиб кетишди.

Шу тариқа “Шальке” ЕЧЛ тарихида кўпчилик бўлиб ҳисобда олдинга борган ҳолатда имкониятни бой бериб қўйган иккинчи жамоа бўлди.

Маълумот учун, бунгача фақатгина Москванинг ЦСКА клуби бундай тарзда мағлуб бўлган эди. “Армиячилар” 2006 йилда “Гамбург”га (2:3) имкониятни бой беришган эди.