Сотиш, ижара ёки олиб қолиш? “Барселона”нинг “бошини оғритаётган” футболчилар

“Барселона”нинг ёзги трансфер бозорида анча фаоллик кўрсатмоқда. “Кўк-анорранглилар” ҳозиргача “Севилья”дан ҳимоячи Клеман Ланглени, “Гремио”дан плеймейкер Артурни, “Бордо”дан эса вингер Малкомни олиб келишга улгурди.

Бу трансферлар эса таркибнинг муҳим қисмлари анча соғлом ва ёшроқ кўринишга олиб келди. Ушбу футболчилар “Барса” таркибини янада кучайтириши аниқ. Клубдан фақатгина уларни таркибга мослаштириш талаб этилади.

Ўз навбатида клубни бир қатор футболчилар ҳам тарк этмоқда. Жамоани Люка Динь “Эвертон”га алмаштирган бўлса, Мундиал қаҳрамони Йерри Минанинг ҳам трансфери якунланай деб қолди.

Аммо таркибнинг қолган қисмичи? “Барселона” янги мавсумда кимларни жамоада олиб қолиши керак? Ёки кимни сотиш ёки ижарага бериб юбориш керак? Squawka нашри бу ҳақида таҳлил қилди.

Денис Суарес, ҳужумкор ярим ҳимоячи, 24 ёш

Суарес 2016-йилда “Барса”га қайта келиб қўшилганида Хавининг рақамини олган эди. Бироқ унинг майдондаги севимли позицияси бу Андрес Иньестанинг ўрни эканлигини алоҳида таъкидлаган эди. Ёш иқтидорли футболчидан кўпчиликнинг умиди катта эди. Бироқ у бундай даражага чиқа олмади.

Денис ажойиб техникага эга, бироқ у “Барселона” эҳтиёж сезаётган сифатга эга эмас. 6-рақамни Артурга бўшатиш учун уни қўйиб юборишнинг вақти келди.

Ҳукм: сотиш

Усмон Дембеле, вингер, 21 ёш

Дембеле дебют мавсумининг дастлабки ярмини орттириб олган жароҳатидан қутулиш билан ўтказди. Иккинчи қисмида эса Валверденинг унинг шижоаткор ва яратувчанлигидан тўғри фойдаланилмагани сабабли унчалик таркибга қўшилиб кета олмади. Малкомнинг келиши эса унинг жамоадаги ўрни йўқотилишига сабаб бўлиши ҳақида кўпчилик бонг урмоқда. Аммо франциялик ҳужумчини қўйиб юбориш катта хато бўлади. Дембеле “Барселона” учун супер иқтидор эгаси ҳисобланади. Унга энг керак нарса бу кўпроқ ўйин амалиёти. Қолганини у майдонда исботлайди.

Ҳукм: олиб қолиш

Рафинья, марказий ярим ҳимоячи, 25 ёш

Ўсмирлик вақтида феноменал ҳужумчи бўлган иқтидор эгаси жароҳатлар эпидемияси сабабли бутун фаолияти қийинчиликка учради. У ўтган мавсумда “Интер”да ажойиб мавсум ўтказди. Бироқ А Серия вакили “Барселона” тарбияланувчиси билан шартномани узайтиришни истамади.

У ҳақиқатдан яхши, аммо унинг ўйин услуби “Барселона”га киришиб кетишига ҳалақит қилади. Ҳужумчи сифатида эса унга энг зарур сифатлар етишмайди. Бирор жойда порлашига имкон бериш зарур.

Ҳукм: сотиш

Пако Алькасер, ҳужумчи, 24 ёш

“Барселона” Алькасерни анъанавий ҳужумчи сифатида Луис Суаресга ўринбосар сифатида олиб келган эди. Бахтга қарши, испаниялик ҳужумчи кучли босим ва тактик фарқли услубларда ўйнашни ўргана олмади. Аммо у барчасига қўл силтагани йўқ ва қаттиқ меҳнат қилишда давом этди. Ҳеч ким уни сотиб олиш ниятида эмас, шу сабабли уни Ла Лиганинг ўртамиёна клубига ижарага бериш энг маъқул вариант. У ўзининг позициясида яна порлай олиши мумкин.

Ҳукм: ижара

Мунир, ҳужумчи, 23 ёш

“Барселона” Алькасерни қўшиб олганида айнан Мунир “қурбон қилинган эди”. Аммо бу катта хато бўлгани кейинчалик ўртага чиқди. Ёш ҳужумчи ўтган мавсумда “Алавес”да ажойиб ижара мавсумини ўтказди. Шунингдек, ноодатий позицияда “Барселона”га мослаша олади. “Кўк-анорранглилар” уни албатта жамоада сақлаб қолиши керак. Унда асосий таркибга кириш учун барча иқтидор етарли.

Ҳукм: олиб қолиш

Андре Гомеш, марказий ярим ҳимоячи, 24 ёш

Агарда сиз ярим ҳимоячи жисмоний ва техник қобилиятларга асосланган деган фикрда бўлсангиз, сиз аниқ Андре Гомеш кабиларни назарда тутяпсиз. Бироқ руҳий куч ҳам футболда кўп нарсани билдиради. Гомешнинг ўзи ҳам каталонияликлар сафига ўтганидан бери руҳий қийинчиликка дучор бўлганини тан олди.

Унинг захираси тугаб қолган, бироқ Европанинг ўртамиёна клубига ижарага бериш унга кам босим юкланишини англатади. Демак у яна қайта порлай олиш имкониятига эга бўлади.

Ҳукм: ижара

Алейш Видаль, ўнг қанот ҳимоячиси, 28 ёш

Алейш Видаль “Барселона”га ўтишни қаттиқ истаганди. Бунинг учун у 6 ой футбол ўйнамасликка ҳам рози бўлди. Бу вақт давомида майдондан ташқарида қолиш унга фақат зарарга ишлаган бўлди. У жамоага умуман киришиб кета олмади. Камига ўнг оёғидан олган жиддий жароҳати ҳам бунга катта салбий таъсир кўрсатди.

Видаль учун энг ёмони клуб Нелсон Семеду тимсолида яқин келажакда ўнг қанот ҳимоячисига эга ва доимий ўйин амалиётини у энди бошқа клубдан излашига тўғри келади.

Ҳукм: сотиш

Томас Вермален, марказий ҳимоячи, 32 ёш

Вермален ҳар томонлама омадли футболчи. У каталонияликлар учун уч ўйин ўйнаб нақ учта соврин ютиб олган! Унинг нуқул жароҳатлар гирдобида юриши дебют учрашувини ортга сурди. У энди жароҳатдан тузалиб сафга қайтганида бошқа бир жароҳат кутиб турарди. Аммо у ветеран, профессионал ҳимоячи ва ғалаба қанчалик муҳим эканини яхши тушунади.

Жароҳатга мойил 32 ёшли футболчини сотишдан мантиқ йўқ. Шу сабабли уни 4-марказий ҳимоячи ролида клубда сақлаб қолиб “Ла Масия” тарбияланувчисига устозлик қилишига имкон бериш керак эмасми? Унинг тажрибаси ёшларга асқотиши табиий.   

Ҳукм: Олиб қолиш

Эркинжон Ғайбуллаев тайёрлади.