Спорт вазирлигининг “спорт ҳафталиги” давом этмоқда
Ads

Хабарингиз бор, Ўзбекистон Республикаси мустақиллигининг 27 йиллигига бағишлаб Республикамизнинг барча ҳудудларида “Спорт ҳафталиги” ташкил этилмоқда. Бунинг ташаббускори Ўзбекистон Республикаси Жисмоний тарбия ва спорт вазирлиги ҳисобланиб, вазирликнинг ҳудудий бошқармалари ва маҳаллий бўлимлари томонидан спорт мусобақалари ва соғломлаштириш тадбирлари юқори савияда ташкил этилмоқда.

Мусобақаларда аҳолининг барча қатламлари иштирокини таъминлаш ва уни оммавийлаштириш, халқ билан мулоқот орқали уларни спортга жалб қилиш, кўтаринки кайфият каби мезонлар илк ўринларда туради. Бир қарасангиз, Тошкент шаҳрининг Олмазор туманида волейбол, футбол, теннис мусобақалари ўтказилаётган бўлса, бир томонда “Пахтакор” Марказий стадионида аҳоли ўртасида ташкил этилан оммавий югуриш мусобақалари кўзимизни қувонтиради.

“Спорт ҳафталиги” вилоятларимиз, чекка ҳудудларимизни ҳам қамраб олди. Сурхондарёнинг Шўрчисида миллий кураш бўйича алп ўғлонларимиз куч беллашсалар, Жиззахнинг Арнасойида баскетбол ва гандбол бўйича 12 ёшдан 16 ёшгача бўлган қизларимиз куч синашдилар. Навоий ҳам спорт мусобақаларидан четта қолмади. Навоий шаҳар Алишер Навоий истироҳат боғи таркибидаги сунъий қопламали мини стадионда ёшларимиз ўртасида футбол беллашувлари ўтказилди. Бундан кўзланган мақсад аҳолининг турли қатламлари орасида оммавий спорт тадбирларини ташкил этиш, ўтказиш, мароқли ва мазмунли дам олишни эканлиги айтиб ўтиш мақсадга мувофиқ.

27 йиллик байрам тантанали арафасида “Спорт ҳафталиги” Бухоронинг Пешкў туманида эркин кураш бўйича болалар-ўсмирлар ўртасида, Тошкент вилоятининг Нурафшон шаҳри, Пискент туманларида спортнинг футбол, бадиий гимнастика, эркин кураш, юнон-рум кураши, белбоғли кураш, каратэ, таэквандо втф турлари бўйича, Самарқандда оғир атлектика ва тош кўтариш  бўйича аҳоли ўртасида мусобақалар ташкил этилди. Андижон вилояти Улуғнор туманида эса футбол бўйича маҳаллар жамоасидан тузилган "Овулмат", "Теракзор", “Мингбулоқ" МФЙ жамоалари ўзаро беллшадилар.

Эслатиб ўтамиз, мазкур спорт тадбирлари ўз иродаси, кучи ва имкониятларига бўлган ишончни мустаҳкамлашни ўргатиш билан бир вақтда, уларга  мардлик ва ватанпарварлик, она Ватанга бўлган садоқат туйғуларини камол топтириш, спортнинг инсон ва оила ҳаётидаги муҳим аҳамияти, унинг жисмоний ва маънавий соғломликнинг асоси эканлигини ёшлар онгига сингдиришга хизмат қилади.

Энг асосийси, жисмоний тарбия ва спортни фуқаролар ўртасида кенг тарғиб қилиш, аҳолининг барча қатламларини спорт билан шуғулланишга жалб қилиш, иқтидорли спортчиларни танлаш ва тайёрлаш тизимини ривожлантиришга асос бўлади.

Азиз дўстлар, Сиз хам "Спорт хафталиги"да фаол иштирок этинг.