Тошкентда қиличбозлик бўйича жаҳон кубогининг очилиш маросими ўтказилди

Хабар бериб ўтганимиздек, Тошкент шаҳрида ўсмир қизлар ўртасида қиличбозликнинг сабля йўналиши бўйича жаҳон кубоги мусобақаси бошланди.

Мусобақада жаҳоннинг 14 мамлакатидан 53 нафар спортчи иштирок этмоқда. Бугун Ўзбекистон гимнастика федерациясига қарашли «Универсал» спорт саройида ушбу нуфузли турнирнинг тантанали очилиш маросими бўлиб ўтди. Тадбир тантанали куй-қўшиқлар билан бошланди. Эстрада хонандаларининг чиқишлари маросимга кўтаринки рух бағишлади. Ёш қиличбозлар иштирокидаги кўргазмали чиқиш эса йиғилганларда катта таассурот қолдирди.

Очилиш маросимида Ўзбекистон Миллий олимпия қўмитаси президенти Умид Аҳмаджонов, Жисмоний тарбия ва спорт вазири Дилмурод Набиев, Тошкент шаҳар ҳокими Жаҳонгир Ортиқхўжаев, Ўзбекистон қиличбозлик федерацияси раиси Рустам Шоабдураҳмонов ҳам иштирок этди. Тадбир давомида сўзга чиққанлар ушбу мусобақанинг қай даражада аҳамиятли эканлиги, ана шундай нуфузли мусобақа Ўзбекистонга ишониб топширилганидан мамнун эканликларини қайд этиб ўтдилар. Шундан сўнг Ўзбекистон Республикаси давлат мадҳияси янгради ва мусобақа расман очиқ деб эълон қилинди.

Қайд этиш лозимки, мазкур жаҳон кубоги қимматли рейтинг очколарини тақдим этиши билан аҳамиятлидир. Яккалик баҳсларида ғолибликни қўлга киритган спортчи 32 рейтинг очкосига эга бўлади. Жамоавий беллашувларда ғолиб бўлган терма жамоа эса 64 рейтинг очкосини қўлга киритади. Бугун яккалик баҳслари бўлиб ўтмоқда. Эртага эса жамоавий беллашувлар ташкил қилинади.