Аббосбек барибир зўр-да! Файзуллаев танқидларга муносиб жавоб қайтарди

Янги мавсумда юқори ўринлар учун курашиши кутилган Москванинг ЦСКА клуби Премьер-лигасининг аввалги икки турида кетма-кет мағлубиятга учраганидан кейин “армиячилар” танқид остида қолди.

Янги бош мураббий – сербиялик Марко Николич шогирдлари сафарда “Краснодар”га 1:2 ва ўз майдонида “Локомотив”га 0:1 ҳисобида ютқазди. Аламлиси шундаки, ҳар икки баҳсда ҳам рақиблар ғалаба тўпини сўнгги дақиқаларда киритиб, ЦСКАга вазиятни ўнглаш учун имкон ҳам, вақт ҳам қолдирмади.

ЦСКАнинг кутилмаган муваффақиятсизликлари туфайли Аббосбек Файзуллаев кўпроқ танқид қилинди. Бу бежиз эмас, албатта. Ўтган мавсумда “армиячилар” чемпионатда энг кўп гол урган жамоа бўлганди. Самарали ҳужумларнинг аксарияти ўзбек легионери иштирокида ташкил этилган, 20 ёшли ҳужумкор футболчимиз жамоадошларининг гол уришига қулай вазиятлар яратиб берган эди.

- Аббосбек Файзуллаев ўтган мавсумда чемпионатда 15 та самарали ҳаракатни амалга оширган эди. Бундай сермаҳсулликни йўқотиш, жамоани жарга етаклайди. Ўзбек футболчисининг кризисни бошдан ўтказаётганини рақамлар билан исботлаш мумкин. Файзуллаев кетма-кет 12 та учрашувдан бери самарали натижа қайд этгани йўқ. Бунга Ўзбекистон терма жамоаси таркибида Олимпиадада ҳам муваффақиятсиз ўйнаганини қўшиш мумкин. Демак, гап фақат ЦСКАда эмас.

Файзуллаевни нозик тарзда тушуниб ўйнайдиган шеригини сотиб юборишди. Энди у Мусаев ва Жемалетдинов билан ҳамкорликда ўйнашни йўлга қўйиши керак. Шунингдек, қанотдаги ҳудудларини бу позицияни эгаллай бошлаган Данил Круговойга бўшатиб бериши талаб этилади, - деб ёзди  football24.ru сайти экспертлари Файзуллаевнинг ўйинида пасайиш давом этаётганини таъкидлаб.

Бироқ Россия Премьер-лигасининг олтинчи турида Аббосбек Файзуллаев танқидларга муносиб  жавоб қайтара олди.

Москваликлар ўз майдонида лига дебютанти “Акрон”ни қабул қилди. Ҳар қандай рақиб билан дадил ва шиддатли ўйин намойиш қилиб келаётган тольяттиликларнинг қаршилиги синдириш учун “армиячилар” узоқ ҳаракат қилди.

ЦСКА Аббосбек Файзуллаевнинг фаол ҳаракатлари эвазига 49-дақиқада ҳисобни очишни уддалади. Ҳамюртимизнинг ўта қулай пасини Тамерлан Мусаев рақиб дарвозасига жойлаб, ҳисобни очди.

20 ёшли легионеримиз голли паси билан ўйинда бурилиш ясаб берди. ЦСКА иккинчи голини узоқ куттирмади ва Иван Обляков ўз номига гол ёздириб қўйди. Беллашув якунланишига яқин Мойзес мезбонларнинг учинчи тўпини киритди. Обляков эса, ҳакам томонидан белгиланган пенальтини аниқ бажариб, ҳисобни 4:0 га етказди. 

“Акрон” футболчилари бир неча вазиятларда легионеримизга нисбатан жуда қўпол ўйнади. Учрашув масаласи деярли ҳал бўлган вазият – 80-дақиқада Аббосбек Файзуллаев ўз ўрнини Рифат Жемалетдиновга бўшатиб берди.

Бу баҳсда яна бир эътиборга молик ҳолат кузатилди. Беллашувнинг 64-дақиқасида Шерзод Эсонов “Акрон” таркибида захирадан майдонга тушиб, фаол ҳаракат қилди.

Москвадаги “ўзбек дербиси”да бу гал Аббосбек Файзуллаев жамоасининг қўли баланд келди.

Айб Файзуллаевдами?

Файзуллаев Европанинг гранд клубига ўтишини исташяпти!

Роберто Манчини кашф қилган легионер футболчиларга Ўзбекистонда ўйнашни тавсия қиляпти!

Шомуродов атрофидаги сўнгги маълумотлар

У кетса, бизда Ҳусанов бор!