Аббосбек Файзуллаевни ПСЖ юлдузи билан қиёслашди

Россиялик журналист Валерий Полевиков ўзининг «Семнадцатый номер» телеграм-каналида Аббосбек Файзуллаевнинг Колумбия дарвозасига киритган тарихий голига (1:3) муносабат билдирди.

«Файзуллаев жаҳон чемпионатлари тарихида бош билан гол урган энг паст бўйли футболчига айланди — унинг бўйи бор-йўғи 167 сантиметр. Аслида эса Аббосбек учун бу одатий ҳол: карьераси давомида у бош билан аллақачон саккизта гол урган, ҳатто бир ўйинда иккита шундай гол киритган пайтлари ҳам бўлган. Албатта, паст бўйли футболчиларга бош билан гол уриш қийинроқ, лекин ҳамма нарса ҳам бўйга боғлиқ эмас. Биринчи навбатда бу — тўғри позиция танлаш, рақибдан илгарилаб ҳаракат қила билиш. Кейинги ўринда эса зарба аниқлиги ва сакраш қобилияти туради. Ана, масалан, Жоау Невеш қандай зарбалар беради», — дея ёзади канал.

Эслатиб ўтамиз, ЖЧ-2026 гуруҳ босқичида Ўзбекистон терма жамоаси шунингдек Португалия ва Конго ДР терма жамоаларига қарши майдонга тушади.