Абдурасул Исмоилов Вьетнамда жанг қилади. Рақиб ҳам маълум бўлди

Хоразм бокс мактаби тарбияланувчиси, профессионал бокснинг енгил вазн (61,2 кг) тоифаси вакили Абдурасул Исмоилов навбатдаги жангини 27 февраль куни Вьетнамда ўтказади. Маълумки, юртдошимиз Жанубий Кореянинг “Cocky Buffalo” промоутерлик компанияси билан ҳамкорлик қилади.

Ушбу боксчимизни айни кунларда жангларга тайёрлаб бораётган мураббий Бобур Нажмиддиновнинг сайтимизга маълум қилишича, Исмоилов 8 раундлик рейтинг жангида рингга кўтарилади. Унинг рақиби филиппинлик Жон Жон Эстрада бўлади.

Маълумот учун, ҳамюртимиз профессионал фаолиятида 9 та жанг ўтказиб, 8 бора ғалаба қозонган ва бир марта мағлубиятга учраган.5 маротаба рақибларини нокаутга учратган. Филиппин вакили эса, 11 та ғалаба, 7 та мағлубият ва 1 дуранг қайд этган.

Мазкур жангда юртдошимизга омад ёр бўлишини тилаб қоламиз!