Абрахамнинг “иштаҳаси” очилиб кетди

“Рома” ҳужумчиси Тэмми Абрахам тўпурарлик маҳоратини намойиш қилиб келмоқда.

“Витесс”га қарши кечган жавоб учрашувининг сўнгги дақиқасида меҳмонлар дарвозасини ишғол қилган англиялик футболчи жамоасини мағлубиятдан қутқариб қолиш баробарида уни Конференциялар лигасининг чорак финалига олиб чиқди.

Ушбу мусобақанинг гуруҳ беллашувларида ўз ҳисобига олтита гол ёздириб қўйган Тэмми Абрахам нимчорак финалдаги аниқ зарбаси билан мусобақадаги голлари сонини еттитага етказиб, турнир тўпурарига айланди.

Тўпурарлар пойгасида кейинги ўринларни олтитадан тўп киритган “Фейеноорд” вакили Сириль Дессерс ва “Будё-Глимт” ўйинчиси Оли Сольбаккен эгаллаб турибди. Уларнинг энг яқин таъқибчиси – “Славия” ҳужумчиси Йира Сор ҳисобида бешта гол бор. Бу ўйинчиларнинг бари чорак финал босқичида иштирок этиш ҳуқуқини қўлга киритди.