Адолатсизлик туфайли ЖЧга тўғридан-тўғри йўлланма ололмаган жамоа, Роналду учун сўнгги мундиал. Қисқаси, Португалия ҳақида гаплашамиз

ЖЧ-2022 стартига тобора оз вақт қолмоқда. Мухлис ва мутахассисларни интизорлик билан куттираётган турнир тез орада бошланади.

Қайси терма жамоалар "ЖЧ-2022"да иштирок этишини яхши биласиз. Агар ҳамон бундан хабардор бўлмасангиз яна бир  бор эслатиб ўтиб кетамиз.

Мундиал стартига бир кун қолди ва биз кетма-кетликда термалар билан сизни таништириб ўтамиз. Демак, "H" гуруҳининг биринчи вакили Португалия терма жамоаси орқали ўзига хос "челленж"имизни давом эттирамиз.

Жамоа ҳақида

Португалия футбол федерацияси. Лақаби — “танланган жамоа”.

Ташкил топган йил: 1914 йил (ФИФАга 1923 йил аъзо бўлган)
Жамоа бош мураббийи: Ренату Сантуш
Жамоа сардори: Криштиану Роналду

Илк расмий учрашуви: Испания – Португалия 3:1 (1921)
Энг йирик ғалаба: Португалия – Лихтенштейн 8:0 (1994)
Энг йирик мағлубият: Португалия – Англия 0:10 (1947)

Португалия терма жамоаси айни пайт ФИФА рейтингида 9-ўринни эгаллаб турибди. Уларнинг энг яхши натижаси 3-поғонадир. “Танланган жамоа” 2010 йилда кучли учликка кира олишни уддалаган. Португалларнинг энг ёмон кўрсаткичи эса 43-ўрин ҳисобланади. Улар 20 аср охирроғида, аниқроқ айтадиган бўлсак, 1998 йилнинг август ойида ушбу поғонага тушиб кетган.

Португалия терма жамоасининг жаҳон чемпионатларидаги тарихи

Португалиянинг жаҳон чемпионатларидаги тарихи жуда қисқа. 2002 йилга қадар жанубликлар атиги икки марта мундиалда қатнашишган. 1966 йилда “танланган жамоа” учинчи ўринни эгаллаган бўлса, 1986 йилда улар гуруҳ босқичидан кейин иштирокини якунлаган. 2002 йилдан буён португалияликлар жаҳон чемпионатида мунтазам равишда қатнашиб келади. Шунингдек, улар 2006 йилда тўртинчи ўрин эгаллаган. Ўшанда Роналду бошчилигидаги жамоа ярим финалда Францияга имкониятни бой берган бўлса, 3-ўрин учун баҳсда Германия қаршилигини синдира олмаган. 2010 ва 2018 йилларда улар 1/8 босқичда, 2002 ва 2014 йилларда гуруҳ босқичидан кейин уйига қайтишган.

Португалия терма жамоасининг гуруҳида кимлар бор?

Португалия терма жамоаси гуруҳдан чиқиши керак. Гана ва Жанубий Корея жанг қилишлари тахмин қилинган бўлса-да, мутахассислар 1/8 финал босқичига “танланган жамоа” билан бирган Уругвай чиқишини тахмин қилмоқда. Агар Португаллар нимчорак финалда Бразилия томонидан "учириб юборилмаслик" учун гуруҳда биринчи ўринни эгаллаш жуда муҳим.

Турниргача босиб ўтган йўли

Португалия терма жамоаси ЖЧга йўлланмани айланма йўллар орқали қўлга киритди. Яъни улар ўз гуруҳида 2-ўринни эгаллаб, плей-оффда қатнашишга мажбур бўлди. Умуман олганда, “танланган жамоа” ҳакамларнинг адолатсизлиги қурбони бўлди. Сабаби уларнинг гуруҳ босқичидаги 100 фоизлик голи ҳисобга олинмади. Португаллар мундиал йўлланмаси учун курашни “А” гуруҳидан бошлади. Шунингдек, гуруҳда Сербия, Ирландия, Люксембург ва Озарбайжон ҳам бор эди. Сантуш шогирдлари илк турда ғалаба қозонган бўлса, иккинчи турда адолатсиз дуранг қурбонига айланди. Сабаби Криштиану Роналдунинг 90-дақиқада Сербия дарвозасига киритган голи инобатга олинмади. Бироқ тўп ҳақиқатдан ҳам чизиқни кесиб ўтган эди. Шу боис, улар 2 очкодан қуруқ қолишди. Аммо бири-бир Португалия сўнгги турда Сербияга мағлуб бўлди. Улар ўз майдонида кечган баҳсда рақибига 1:2 ҳисобида мағлуб бўлди ва 17 очко билан иккинчи ўринга тушиб кетди.

Плей-оффнинг биринчи босқичида Португалияга Туркия рақиблик қилди. “Драгау” стадионида бўлиб ўтган беллашувда “танланган жамоа” туркларни 3:1 ҳисобида мағлуб этди ва иккинчи босқичда йўлланма олди. Ҳал қилувчи раундда Роналду жамоасига Италияни ЖЧдан мосуво қилган Шимолий Македония кутаётган эди. Кўпчиликнинг эътибор марказида бўлган беллашув тақдирини Бруно Фернандешнинг дубли ҳал қилди – Португалия – Шимолий Македони 2:0.

Шу тариқа, португаллар қийин бўлса-да, Қатардаги мундиалга боришни яна уддалашди.

Жамоа етакчилари

Айтиш керакки, Португалия ҳозирда жуда ҳам юлдузли таркибга эга. Ҳатто дарвоза чизиғида ҳам анча рақобат борлигини кўриш мумкин. Боиси, Кошта ҳам, Патрисиу ҳам, Жозе Са ҳам ўз клубининг асосий футболчилари ҳисобланади.

Ҳимояда эса Канселу, Далот, Рубен Диаш, Пепе ва Геррейру деган номлар исталган жамоа ҳужумини қўрқитиб қўйиши мумкин. Қолаверса, ярим ҳимояда ўйнайдиган Бернарду Силва ва Бруно Фернандешга ортиқча таъриф бериш шарт эмас, чамамизда.

Ҳужум чизиғи эса Португалияда анчайин юлдузлидир. Оддий Криштиану Роналду номи бутун бир жамоанинг қандай кучга эга эканлигини билдиради. Шунингдек, бу катта эҳтимол билан КриРо учун сўнгги мундиал ҳисобланади ва бутун жамоа айнан у учун ўйнаши табиий. Сабаби Роналдунинг коллекциясида барча соврин бор, аммо битта ЖЧ кубоги бундан мустасно.

Қолаверса, Андре Силва, Жоау Феликс ва Рафаэль Леау каби футболчилар ҳам ҳужум чизиғида Роналдуга ёрдам беришади.

Ҳозирда “Transfermarkt” портали “танланган жамоа”нинг умумий қийматини 937 миллион еврога баҳоламоқда. Таркибдаги энг қиммат футболчи эса “Милан” футболчиси Рафаэль Леау ҳисобланади. Унинг нархи 85 миллон еврога баҳоланган.

Дарвозабонлар: Диогу Кошта (“Порту”), Руй Патрисиу (“Рома”) Жозе Са (“Вулверхэмптон”).

Ҳимоячилар: Диогу Далот (“Манчестер Юнайтед”), Жоау Канселу, Рубен Диаш (иккиси ҳам – “Манчестер Сити”), Рафаэл Геррейру (“Боруссия”  Дортмунд), Антониу Силва (“Бенфика”), Пепе (“Порту”), Нуну Мендеш, Данилу Перейра (иккиси ҳам - ПСЖ).

Ярим ҳимоячилар: Жоау Пальинья (“Фулхэм”), Рубен Невеш, Матеуш Нунеш (барчаси – “Вулверхэмптон”), Бернарду Силва (“Манчестер Сити”), Бруну Фернандеш (“Манчестер Юнайтед”), Жоау Мариу (“Бенфика”), Отавио (“Порту”), Витинья (ПСЖ), Вильям Карвалью (“Бетис”).

Ҳужумчилар: Андре Силва (“РБ Лейпциг”), Криштиану Роналду (“Манчестер Юнайтед”), Гонсалу Рамуш (“Бенфика”), Жоау Феликс (“Атлетико” Мадрид), Рикарду Орта (“Брага”), Рафаэл Леау (“Милан”).

ЖЧ-2022даги тақвими

1-тур
24 ноябрь. Португалия – Гана;

2-тур
28 ноябрь. Португалия – Уругвай;

3-тур
2 декабрь. Жанубий Корея – Португалия.