Академик эшкак эшувчиларимизнинг навбатдаги муваффақияти

Жорий йилнинг 7-15 апрель кунлари Италиянинг Пьедкуло шаҳрида академик эшкак эшиш бўйича анъанавий "Паоло Де Алоэ" халқаро турнири ва ўқув-машғулот йиғини бўлиб ўтди. Унда Ўзбекистон спорт делегацияси ҳам иштирок этди дея хабар бермоыда Ўзбекистон Жисмоний тарбия ва спорт вазирлиги матбуот хизмати.

Анъанавий "Паоло Де Алоэ" халқаро турнирида 25 давлатдан ташриф буюрган спортчилар қаторида вакилларимиз ҳам омадларини синаб кўришди. Аёллар ўртасида 2000 метрга ўтказилган яккалик баҳсларида спортчимиз Малика Тагматова маррага учинчи бўлиб етиб келди ва бронза медалини қўлга киритди. Айнан шу йўналишда эркаклар ўртасида ўтказилган баҳсларда яна бир вакилимиз Меҳрож Маматжонов ҳам учинчи ўринни қўлга киритди.

Ушбу халқаро турнир ва ўқув-машғулот йиғинида миллий ва ёшлар терма жамоаларимиз аъзолари бўлган 25 нафар спортчимиз қатнашди. Улар мураббийларимиз Сергей Тян, Артём Кудряшов ва Фозилбек Хонхўжаев қўл остида шуғулланишди.

Шунингдек, 23 давлатдан жами 400 нафардан ортиқ спортчилар иштирок этадиган тадбирларда вакилларимиз 2020 йил Токио шаҳри (Япония)да бўлиб ўтадиган Олимпия ўйинларида тўқнаш келиши мумкин бўлган спортчиларнинг техник-тактик услубларини ўрганиш имкониятига эга бўлишди.